Carsten Frank Hansen peqquserlussimasutut unnerluunneqartoq

Aningaasaqarnermut Nunamullu Namminermut Naalakkersuisoqarfimmi ukioq kingulleq septembarimi ulluni marlunni pisortaasimasoq Carsten Frank Hansen unnerluutigineqarpoq.

Danskit aviisiat Berlingske Business ataasinngornermi allappoq, Carsten Frank Hansen Danmarkimi politiinit peqquserlussimasutut unnerluunneqartoq. Eqqartuunneqaruni parnaarunneqarsinnaavoq. Qaammatini arlaqanngitsuni parnaarussaasinnaasoq unnerluussisup Kirsten Flummerip oqaatigaa.

Danske Andelskassers Banks fynske filial Odensemi Carsten Frank Hansenip inuussutissarsiornermut tunngasunik siunersuisarfimmi pisortatut atorfeqarsimanini unnerluunneqaatigaa, piginneqatigiiffiup X-ip 1,9 million koruuninik aningaasanik atornissamut qinnuteqaataanut akuersisimanera unnerluunneqarpoq.

335.000 koruuninik taarsiisoqarnissaa piumasarineqartoq
Unnerluummi ilaatigut allaqqavoq Carsten Frank Hansen 335.000 koruuninik Amagerbankimut nuussisimasoq piginneqatigiiffimmut Y-mut. Aqaguani nammineq kontoanut aningaasat ilineqarput, aningaasaateqarfillu Danske Andelskassers Bank 335.000 koruuninik annaasaqarluni, Berlingske allappoq.

Peqquserlussimasutut taamaasilluni unnerluunneqarpoq. Eqqunngitsumik piginneqatigiiffimmut atukkiisoqarsimasoq Politiinit nalunaarutigineqarpoq.

Carsten Frank Hansen aviisimut Fyens Stifttidendemut 2013-mi oqarpoq pisumut malugusulluni, Aningaasaqarnermut Nunamullu Namminermut Naalakkersuisoqarfimmi ulluni suliffiusuni marlunni sulereerluni soraaginnartariaqarsimavoq, Fynimi politiit unnerluussinerat pissutaalluni.

Naalakkersuisoqarfimmut atorfinitsinneqalernermi nalaani sooq politiilersuunneqarnini isortuussimaneraa Fyens Stiftidendemut ilaatigut ima oqarpoq:

- Qanoq inissisimanersunga ilisimagakku oqaatiginngilara. Suliaq annertunngikkaluarpoq, inuillu eqqortoq paasigaluarunikku illaatigiinnassagaluarpaat. Politikkikkulli maannakkut una atorneqarpoq, kusananngilaq.

Soraarnermini oqaasii
Naalakkersuisoqarfimmi tunuarami nassuiarpaa sooq tunuarnerluni.

- Danske Andelskassers Bankimi suliunnaarama peqquserlussimasutut unnerluunneqarpunga. Misissuineq aallartippoq, uannullu ajunngitsumik kinguneqarumaartoq naatsorsuutigaara.

- Pisoq nalilernerlussimavara Namminersorlutik Oqartussallu pisoq pillugu nalunaarutiginikuunagu. Greentop Greenland ApS-imi atorfera qimappara Namminersorlutik Oqartussani atorfininnera pissutaalluni. Namminersorlutik Oqartussani atorfeqalereernerma kingorna Greentop Greenlandimi atorfinnit soraarnera saqqummerpoq.

Unnerluussut pillugu Berlingske Businessip unnerluunneqartoq Carsten Frank Hansen attaveqarfigaa, inuttaatali unnerluussineq oqaaseqarfiginiarnagu oqaatigaa.

Sermitsiaq.AG arlaleriarluni Carsten Frank Hansenimut apersuerusulluni saaffiginnittaraluarpoq kinguneqanngitsumik.

Carsten Frank Hansenimut allaaserisat tunngasut atuakkit