Topchef-exit
Carsten Frank Hansen imatut akissarsivoq
Carsten Frank Hansenimik mamianartuliamut atatillugu namminersorlutik oqartussanut - taamalu inuiaqatigiinnut - aningaasartuutit pingaarnerpaat takukkit
Naalakkersuisoqarfimmi pisortaasimasoq aningaasarpassuarnik tunineqarpa ataasinngormat Aningaasaqarnermut Nunallu Iluani Pissutsinut Naalakkersuisoqarfimmit pisortaanertut tunuarami?
Qanoq amerlatigisunik aningaasarsiva?
Aamma soraarnerussutisianik taaneqartartunik tunineqarpa, nammineq tunuaraluarluni?
Sermitsiaq.AG-p Svend Hardenberg, Siulittaasup Naalakkersuisoqarfiani pisortaq aamma Naliliinermut Ataatsimiititaliami siulittaasoq, aningaasanut tunngasunik pingaarnerpaanik apeqquteqarfigaa.
Akissutai apeqqutit ataanni atuakkit:
– Carsten Frank Hansen qaammatini qassini akissarsitinneqarpa?
– Carsten Frank Hansen piffissami 2013-imi septembarip 12-ianniit 2013-imi septembarip 16-iannut akissarsisinneqarpoq.
– Qangarpiaq atorfimminit tunuarpa?
– Carsten Frank Hansen sulilerpoq sisamanngornermi septembarip 12-ianni 2013 soraarniuteqarlunilu ataasinngornermi septembarip 16-ianni 2013. Tamatumunnga atatillugu Carsten Frank Hansen nammineq kissaatigisaa malillugu nalinginnaasumik soraarnissamut piffissaliisoqanngilaq.
– Qanoq qaammammusiaqarpa?
– Carsten Frank Hansenip qaammammusiai ukiumut tapiissutit ilanngullugit 86.674,74 koruuniupput, sulisitsisumit soraarnerussutisiartaqanngitsut namminerlu soraarnerussutisiassanut ileqqaagaqartaqanngitsut.
– Soraarnerussutisiaqassava imaluunniit allanik ajunngitsorsiassaqarpa nammineq tunuaraluarluni?
– Carsten Frank Hansenip Danmarkimut angerlarnera akilerneqarpoq. Tamatuma saniatigut allanik ajunngitsorsitinneqanngilaq, Svend Hardenberg oqarpoq.
Berlingske-p ataasinngormat oqaluttuaraa Aningaasaqarnermut Nunallu Iluani Pissutsinut Naalakkersuisoqarfimmi pisortatut atorfinitsinneqaqqammersoq Carsten Frank Hansen qaammatit 16-it matuma siornatigut Danmarkimi peqquserluuteqarsimasutut qallunaat politiivinit unnerluutigineqarsimasoq.
Taamaattumik Nuummi ulluni suliffiusuni marluinnarni sulereerluni tunuarpoq.
Carsten Frank Hansenip Danske Andelskassers Bankip Fynimi immikkoortoqarfiani immikkoortoqarfimmi pisortaanermini - politiinut nalunaarutiginninneq malillugu - aningaaserivik 335.000 koruuninik annaasaqartissimavaa.
Carsten Frank Hansenimik mamianartuliaq pillugu Sermitsiaq.AG-p allaaserisai tamaasa atuakkit