Canadap nunanut allanut ministeria ataatsimeeqatigalugu

Nunanut allanut ministerip Martin Lidegaardip aggustip 25-anni canadap nunanut allanut ministeria John Baird ataatsimeeqatigissavaa. Ataatsimiinnerit marluussapput. Issittumut tunngasut pillugit ataatsimiinnermi Naalakkersuisut siulittaasuat Aleqa Hammond peqataassaaq. Ataatsimiinnermi tassani ilaatigut sammineqassaaq Issittumi Siunnersuisoqatigiinni sulineq, tassani maanna Canadap siulittaasuuffik tigummillugu.

Aleqa Hammond namminersorlutik oqartussat nittartagaanni tusagassiorfinnut nalunaarutikkut paasissutissiivoq sammisat, Nunavummi ingerlatsivissuarnik marlunnik Nuummi oqaloqatigiissutigeqqammisani, ataasinngorpat canadap nunanut allanut ministerianik John Bairdimik ataatsimeeqateqaleruni saqqummiunniarlugit. Tassaapput illua'tungeriilluni ilinniagaqarnermi, sulisartoqarnermi aningaasaliissuteqarnermilu suleqatigiinnissat.

– Kissaatiginartippara Nunavummit ilinniagaqartut sulisartullu amerlanerujussuit Kalaallit Nunaanni periarfissat pioreersut atorniassagaat, aammalu kalaallit ilinniagaqartut suliffissarsiortullu amerlanerusut ukiuni makkunani Canadap Issittortaani periarfissat isiginialissagaat. Nunavut naalakkersuisui aamma Nunavut Tunngavik Inc peqatigalugit anguniagaq tamanna siuarsarniarpara. Aamma kalaallit ingerlatsiviisa Nunavummik qaninnerusumik suleqateqarnermi periarfissat maluginiartariaqarpaat, Aleqa Hammond namminersorlutik oqartussat nittartagaanni tusagassiorfinnut nalunaarutikkut allappoq. Oqaatigaalu tamatumunnga atatillugu ataasinngormat tamakku canadap nunanut allanut ministerianik oqaloqatigiissutiginiarlugit.

Tamatumani soqutiginartuuvoq canadap avatangiisinut ministeriata Leona Aglukkaq-p ministeritut aamma Issittumi Siunnersuisoqatigiinni oqaatigisimammagu Kalaallit Nunaat Canadalu inuussutissarsiornikkut suleqatigiinnerat annertusartariaqartoq. Qallunaalli kunngissaq Frederik siuttoralugu septembarip 17-anniit 19-iannut inuussutissarsiornikkut nittarsaaniarnerani Kalaallit Nunaat peqataanngivippoq.

Martin Lidegaardip John Bairdillu ataatsimiinnerisa aappaani sammineqassapput illugiilluni niueqatigiinnissamik isumaqatigiissut kiisalu Danmarkip Canadallu akornanni nunanut allanut isumannaatsuunermullu politikkimut tunngasut, qularnanngitsumillu qallunaat Canadami septembarip 17-anniit 19-iannut inuussutissarsiornikkut nittarsaaniarnerat kunngissaq Frederik siuttoralugu. Ataatsimiinnermi tassani aamma Ukrainemi, Irakimi kiisalu Gazami pisut erloqinartut oqaluuserineqassapput. Tamatuma saniatigut naatsorsuutigineqarpoq nunanut allanut ministerit taakkua marluk NATO-mut tunngasut arlallit oqaluuserissagaat, NATO-p septembarip 4-aanni 5-annilu Walesimi ataatsimeersuarnissaa sioqqullugu.