Canadamiut isiginnaagassiaat akeqanngitsumik Katuami takutinneqassaaq

- Canadamiut isiginnaagassiaat kulturinut arlalinnut tunngasoq akeqanngitsumik Katuamut takusaruk.

Kulturikkut illorsuaq Katuaq Nuummiittoq tusagassiutinut nalunaaruteqarpoq.

- 'Night'-imi antropologi Torontominngaanneersup niviarsiaqqallu naggueqatitta Pond Inlet-imi Nunavumi silap kaperlannerani tassanngaannapiloortumik inuuneri naapipput. Daniella ajunngitsumik siunertaqarluni Piuyup ataavata saarngii ukiorpaaluit katersugaasivimmiinnikut paarivai. Takorloorpaa pingaarutilimmik utertinneqassasut, taamaallaalliuna paasilerlugu Piuyup ilaqutaasalu akornanni pisut alianartut tulleeriiaallutik takkussuuttuarsimasut.

Ukiut pingasut ingerlanerani Pond Inlet-imi Nunavumiittumi Akureyrimilu Islandimiittumi kaperlattarnerani sanaaq, 'Night'-ip nagguik, siunertaq kaperlallu sammisaralugit kujataani kiattuni avannaa pillugu mumisippaa.

Oqaatsit amerlasuut atorlugit sanaaq

Isiginnaartitsisartut ’Human Cargo’ Canadamit Torontominngaanneerput, isiginnaagassianik immikkuullarissunik oqaatsitsigut assigiinngitsunik isiginnaartitsisut kulturikkut assigiinngitsunik tunuliaqutillit ataatsimoortillugit pilersitsisartut.

- Isiginnaartitsisartutut inuit silaasa killissai tikillugit misissuisarput, isiginnaartunullu avatangiisit toqqissisimanartut pilersittarlugit, taamaasillugu erseqqissunik pisariusunillu isummanik tunngavilinnik oqallinnernik peqataatittarlugit. ’Human Cargo’-p isiginnaagassiaasa sunniutai ersaripput: inoqatigiinnut politikkinullu tunngasunik allannguineq pilersillugu, Katuaq tusagassiutinut nalunaaruteqarpoq.

Isiginnaagassiaq 'Night' pingasunngornermi martsip aqqaneq-aappaanni Katuami takutinneqassaaq nalunaaqutaq 20.00-imiit 21.15-ip tungaanut. Takutinneqarnera akeqanngilaq. Isiginnaagassiap takunissaanut isissutissat saaffiginnittarfimmut aaneqarsinnaapput. 11-nik ukioqalereersimasunut innersuussaavoq.