Camp Centurymi mingutsitsineq pillugu USA-mut suli attaveqartoqanngitsoq

Sakkutooqarfiusimasumik Camp Centurymik misissuinerup kingorna, mingutsitsinermik kinguneqaratarsinnaasoq paasineqarmat, danskit naalakkersuisui USA-mut suli attaveqarsimanngillat. Folketingimi Kalaallit Nunaat pillugu ataatsimiititaliami ullumi isumasioqatigiittoqareersorlu tamanna paasinarsivoq.

Atuaruk: Misissuineq nutaaq: Sakkutooqarfik atomreaktorilik sermimit saqqummissaaq

Suliamut tunngatillugu Kristian Jensen (V), USA-mut suli attaveqarsimanani ersarissumik akissuteqarpoq.

- Uppernarsakkamik qularnaateqanngitsumik peqanngikkaanni, misilittakkakka naapertorlugit Amerikamiut angusaqarfiuneq ajorput, isumasioqatigiinnermi nassuiaavoq.

PCB ulorianarnerpaasoq
Sakkutooqarfiusimasumi mingutsitsinermut kikkut akisussaasuunerat erseqqarinnginnera ajornartorsiutaavoq. Imeq radioaktivinik akoqartumut maangaannartumut tunngatillugu suliaq ersarippoq: Taanna USA-p akisussaaffigaa. Kisianni radioaktiviteti ajornartorsiut annikitsuinnaavoq.

Eqqakkat sinneri suli ulorianarnerupput, ingammik PCB, sakkutooqarfimmi savimminernut qalipaatitut atorneqarsimasoq. PCB ilaatigut naartunut qaratsamik ajoqusiisinnaapput. Aammalu uumasunut miluumasunut tassaniittunut ajornartorsiutinngorsinnaavoq.

Atuaruk: USA-p sermersuarmi eqqagai eqqissiviilliortitsipput

Eqqakkanik iluarsaassinissamut ersarissumik isumaqatigiissuteqanngitsoq
Tassungalu eqqakkamut tunngatillugu USA aamma Danmarkip/Kalaallit Nunaatalu akornanni, kikkut iluarsaassinissamut akisussaaffeqarnerannik ersarissumik isumaqatigiissuteqartoqanngilaq.

Atuaruk: Sakkutooqarfikumi mingutsitsineq pillugu Sara Olsvig akissutiserusuppoq

Kristian Jensen nangillugu aperineqarpoq, Amerikamiunut oqartussanut aallarniutigalugu akisussaaffeqarsinnaanerannik qanoq isumaqarnerat aperalugit attaveqarsinnaannginnersoq.

- Tamanna akisussaaffeqarfigineraat toqqaannartumik aperigaluaruma, taava akisussaannginnerarlutik oqassasut qularinngilara, Kristian Jensen (V) akivoq.

Sakkutooqarfiit pillugit isumaqatigiissutit assigiinngitsut
Tamatuma saniatigut erseqqissarpaa, Camp Century pillugu paasiniaaneq sakkutooqarfinnut allanut imaluunniit Pituffimmut nuuginnarneqarsinnaanngitsut. Sakkutooqarfinnut isumaqatigiissutit assigiinngitsuupput, taamaattumillu ataasiakkaarlugit kiap suna iluarsartuutissaneraa paasiniarneqassaaq.

Atuaruk: Camp Century: Kristian Jensen (V) iliuuseqarnissamik neriorsuivoq

Mingutsitsineq misissorneqassaaq
Sermersuup iluani Camp Centurymi PCB aamma dieselit suut tassaniinnersut, danskit naalakkersuisui Naalakkersuisut suleqatigalugit misissoqqissaarneqassasoq, isumasioqatigiinnermi erseqqissarneqarpoq.

Alloriarneq siullertut misissuinerit taakku qanoq pissanersut nassuiarneqassapput.

Atuaruk: Aleqa: Camp Centurymi iluarsaassineq isumagineqarli