Buuarsikkut katersugaasivimmi

Sisamanngornermi decembarip ulluisa qulinganni nalunaaqutaq 17.00 Nuummi Eqqumiitsulianik Katersugaasivimmi quiassuaatiginnilluni titartaasartut Robert Holmenep, Per Dankerip aamma Martin Brandtip titartagaat ‘Nunatsinni Quiassuarneq’ saqqummersinneqarnerat ammarnersiorneqassapput.

Quiassuaatiginnilluni titartaariaaseq immikkuullarissuusoq eqqumiitsuliornermut tusagassiornermullu ersarissunik attuumassuteqarpoq. Nuummi Eqqumiitsulianik Katersugaasivimmi quiassuaatiginnilluni titartakkat pitsaanerpaat ilaat 150-it missaanniittut saqqummersinneqassapput.

Ukiut 40-t
Saqqummersitsinermi Parcarsualinnik titartakkat 1969-imeersut siulliit, aammali titartakkat nutaarluinnaat, ilaatinneqassapput.

Kalaallit Nunaanni illarneq pingaarutilerujussuuvoq aamma ukiuni 40-ni inuit, aalajangernerit iliuutsillu aalajangersimasut qitiutillugit quiasuttarnernut iluaqutaalluinnartarsimavoq. Akuttunngitsumik qungujunnartortalinnik, mitalliikujunnernik ingasattajaarnernillu akullugit.

Robert Holmenep titartartagai Buuarsikkut & Co, ukiuni kiingullerni ilaatigut Nuuk UgeAvisenikkut kingusinnerusukkullu Sermitsiakkut takuteqqinneqartarput. Buuarsikkunni inuit Kalaallit Nunaanni illoqarfinni quianartunik eqqumiikajaanillu pisartunit toqqaannartumik tigulaagaakkajunnerusarput, inuillu tamakku inuunerminni pisartunut tappissuupput, naak titartakkat amerlanertigut politikkikkut aalajangernernit oqallinninnerniillu tunngaveqartaraluartut.

Parcarsuallit
Parcarsualinnut qupaloraarsuit, nannut, politikerit innuttaasullu nalinginnaasut ilaatinneqarput aamma tamakku 1969-imiilli inuppassuit qungujutsittarsimavaat. Titartakkat ukiorpassuarni ukiumoortumik quppersagaaqqakkut saqqummersinneqartarsimapput aamma Parcarsuallit kingulliit 2015-2016 saqqummersinneqaqqammerput.

Parcarsuallit aqqutigalugit Per Danker maannakkorpiaq politikkikkut sammisat toqqaannartumik suliarisarpai - kalaallit politikerit Folketingimut ilaasortat aamma Inatsisartunut ilaasortat eqqarsaatigalugit.

Martin Brandt
Martin Brandt Kalaallit Nunaanni quiassuaatiginnilluni titartaasartut nutaanersaraat - KNR-imi nangeqattaartuliami Labrador Kangiann´-imit ilisimaneqartoq - aammali Nuummi siornatigut aviisimi sapaatit akunneranut saqqummersartumi Tiu Tui-mi titartakkanik saqqummersitsisarsimavoq.

Martin Brandtip titartakkamini inuk ataasiinnaq suliarineq ajorpaa kisiannili titartakkamini Kitaani popimik kulturimut aamma Kalaallit Nunaata avataani silarsuarmut ersarissumik attuumassutit takutittarpai. Titartagaasa kingulliit ilaat Nuuk Imeq-mit immiaaqqat puuini qanittukkut tunisassiarineqartuni imatut allagartalinnut isummersuutaasoq tassaavoq 'Asasaarannguara'

Sermitsiaq.AG-mi Buuarsikkut takukkit