qinersineq
Brugseni Dorisimut: Uagutsinni taamaanngilaq
Siumumeersup Doris Jakobsenip namminersortut pisortallu tikisitanik atuivallaarnerarlugit sapaammi isornartorsiorpai. Maanna Kalaallit Nunaanni Brugsenimit akineqarpoq Brugsenimi pissutsit tamaanngitsut
Tusagassiorfinnut nalunaarutikkut ‘Suliffeqarfissuit nunatsinnut naleqqussarlik!’ Doris Jakobsenip, Siumut tunuliaqutaralugu Inatsisartunut qinigassanngortittup, nunatsinni ingerlatsiviit isornartorsiorpai kalaallinik sanasunik sulisoqartannginnerannik, tikisitalli atortarmatigit, taamaasillutillu nunaqavissut atorfissaannik arsaarinnillutik.
Kiisalu Brugseni Pisiffillu isornartorsiorpai, pisiniarfimmi aqutsisut amerligaluttuinnartut avataaneersut atortarmatigit, uffa pisiniarfimmiutut ilinniagaqarsimasorpassuaqaraluartoq.
– Ineriartorneq tamanna sooq akueriinnassavarput pissusissamisoortutullu isigalugu?, Doris Jakobsen aperivoq erseqqissarlugulu ineriartorneq tamanna akuerinngilluinnarini.
Maannali Brugseni Doris Jakobsenip uparuaaneranut akissuteqarpoq.
Atuaruk: Pissutsit taamaanngillat, Doris
Atuaruk: Atorfinitsitsisarnermut politikki isornartorsiorpaa
Brugseni: Tamanna eqqunngilaq
Doris Jakobsenip oqarnera naapertorlugu pisiniarfimmi aqutsisut amerligaluttuinnartut avataaneersut Brugsenip atortarpai.
- Brugsenimi sulisut 500-t missaanniipput tassanngalu 5 procentit missaat tikisitaallutik. Tikisitat tassaanerusarput neqaarniat iffiortulluunniit – taakkunani ilinniarsimasut amigaatigineqarmata, Brugseni allappoq.
Ukiut tamaasa ilinniartut qulit missaanniittut Kalaallit Nunaanni Brugsenimiit naammassisarput, ukiumullu ilinniartut 30-40-t missaanniittut sulisorineqartarlutik.
- Brugseni annertoorujussuarmik iliuuseqartarpoq ilinniartunik ilinniartitsiumalluni. Inuusuttut pikkorissut inuiaqatigiinni kivitseqataasinnaasut tapersersorpagut, Brugseni Doris Jakobsenimut akissuteqarluni allappoq.
Aamma Kalaallit Nunaanni Brugsenimit Doris Jakobseni sukumiinerusumik paasisaqarusukkuni saaffiginninnissaanut tikilluaqquneqarpoq.