ukiumut angusat

Brugseni angusaminik rekortileeqqippoq

Niuertarfiit ukiut pingajussaanik angusaminnik rekortileeqqipput. Brugseni 2015-mi akileraareernermi 26 million koruunik sinneqartoorpoq

Brugsenimi pisortaq, Susanne Christensen

Kalaallit Nunaanni Brugseni suli annertusigaluttuinnarpoq aningaasarsioraluttuinnarlunilu.

Niuertarfik ukiut pingajussaanik rekortiliilluni angusaqaqqippoq. Kalaallit Nunaanni Brugseni ukiumi naatsorsuiffiusumi 2014/15-imi akileraareernermi 26 millionit koruunit anguai, tamannalu siorna ukiumi naatsorsuiffiusumit 2 millionit koruuninik pitsaaneruvoq.

Aningaasaliineq
Iluatsitsilluarneq anguneqarsimavoq Kalaallit Nunaanni Brugsenimi naammassisaqarsinnaassutsip pitsaaliuinerullu aallunnerisigut, niuertarfik allappoq.

- Inernerisap pitsaasup sinneqartoorutitsinnik Kalaallit Nunaanni aningaasaliinissatsinnut periarfissippaatigut, tamannalu nunatsinni inuiaqatigiinnut iluaqutaassaaq, Kalaallit Nunaanni Brigsenimi pisortaq, Susanne Christensen oqarpoq.

Atuaruk: Brugseni aatsaat taama amerlatigisunik agguagarsititsissaaq

Niuertarfik 2015-imi 32 millionit koruunit nalinginut aningaasaliissuteqarpoq. Ilaatigut Paamiuni aamma Narsami Brugseninik sanaqqiisoqarlunilu nutarterisoqarpoq. Seqerngup qinngorneri atorlugit nukissiutinik Nanortalimmi Paamiunilu Brugsenini ikkussisoqarpoq. Nuummi illoqarfiup qeqqani pisiniarfimmik nutaamik ammaasoqarpoq – Panduro.

Brugseni ukiup massuma ingerlanerani Nuummi Qinngorpumi niuertarfimmik nutaamik ammaassaaq.

Assit takukkit: Brugseni pisiniarfimmik nutaamik Qinngorpumi ammaalerpoq

Powered by Labrador CMS