Brugseni aatsaat taama angusarissaartigaaq

Kalaallit Nunaanni Brugseni, KNB, angusarissaarluarpoq, ilimagineqareersimagaluartummi uniorlugit annertunerusumik sinneqartoorami. Suliffeqarfiup aningaasaqarnikkut siuariartornini angusaminik nalunaaruteqarnerminni ersersinneqarpoq.

Akileraarutit suli ilanngaatiginagit suliffeqarfik 32,6 million koruuninik sinneqartoorpoq. Ukioq manna 24,239 million koruuninik angusaqartoqarpoq 2012-imi 9,794 million koruuninik angusaqarluni.

- Angusarineqartoq iluarisimaarparput. Ingerlatsinerput attatiinnarparput, siuariartortumillu angusaqarnissaq siunertaralugu. Toqqorsivimmiisitat pitsaanerusumik aqunneqarnissaat kiisalu aningaasartuutit pitsaanerusumik ingerlanissaat sulissutigisimavagut, tamannalu pitsaasumik angusaqarfigaarput, Kalaallit Nunaanni Brugsenimi siulersuisunut siulittaasoq Ib Lennert Olsen oqarpoq.

- Aningaasartuutit pitsaanerusumik aqunneqarnissaat anguniarsimavarput, suleqatittalu pikkorissut tamanna anguaat. Sinneqartoornitta ilutigisaanik inuiaqatigiinnut tunniussisinnaalerpugut.

Siuariartorneq
- Sinneqartoornerput uniffigiinnassanngilarput. Pingaaruteqarpormi inuiaqatigiinnut tunniusseqqittarnissat. Suleqatitsinnik siuarsaanissaq 2014-imi sulissutigissavarput, Ib Lennert Olsen oqarpoq.

Kalaallit Nunaanni Brugseni 100 procentimik kalaallinit ilaasortanit pigineqartoq, arfineq marlunnik peqatigiiffeqarpoq 13-inillu pisiniarfeqarluni.

2013-imi 8 million koruuninik ilaasortaasut agguagassarsisinneqarput.

Kalaallit Nunaanni Brugseni 37.906-nik ilaasortaqarpoq, 2013-imilu 1370-nik nutaanik ilaasortaqalerluni.