Pilersuineq

Brugseni 2017-imut angalanissamut pilersaarummik ujartuivoq

Niuertarfiuteqarfiup Naalakkersusiut naammassinissaat utaqqiinnarpaat

Royal Arctic Linep umiarsuaa Nuka Arctica

Niuertarfiutinut nioqqutissat qaqugukkut tikisissinnaanerlugit, umiarsuit qaqugukkut tikinnissaat ilisimanngikkaanni pilersaarusiorneqarsinnaanngilluinnarpoq.

Brugsenip tamanna uppernarsivaa. Niuertarfiuteqarfitillillu maanna angalanissamut pilersaarut nutaaq utaqqikatalluinnaramiuk, pisortaq Susanne Christensen Naalakkersuisut siulittaasuannut Kim Kielsenimut ammasumik allagaqarpoq.

Politikkikkut akuerineqartussaq
Naalakkersuinermik suliallik umiarsuit angalanissamut pilersaarutaannut, Royal Arctic Linep nunanit allanut Nunatsinnullu malittarisassiortartoq suli akuersinngimmata, saaffiginnissut Kielsenip nerrivianut ilineqarpoq.

Niuertarfiutillillu ammasumik allagaqarnermini, angalanissamut pilersaarut kingusinaarnera siullermiilinngtsoq nassuerutigaa.

Ajornarluinnartoq
- Qaammatinut tulliuttunut pilersaarusiornissaq ajornarluinnarpoq. Tamannalu suliffeqarfitsinnut nuanninngitsumik kinguneqartitsisinnaavoq, aammali pisisarfitsinnut pisinianullu. Nioqqutissarpassuit eqqaannarneqarnissaat takorloorneqarsinnaavoq, taamatullu nioqqutissarpassuit kasiiginnarneqassapput, pisortaq allakkami ammasumi naqissusiivoq.

Taassuma saniatigut aarlerisaarutigaa, Naalakkersuisut aalajangerniaasaarneranni - pisiniarfiit nioqqutissaaleqisinnaasut - pisisartullu nuannaanngissinnaasut.

Sooruna?
- Sooruna Naalakkersuisutut iliuuseqarumanngittutit? Sooruna angalanissamut pilersaarut akueriumanngikkissi, aali septembarimili akuerisassatut piareersimagaluartoq. Sooruna iliuuseqarnianngitsusi? Susanne Christensen allakkami ammasumik aperivoq.

Powered by Labrador CMS