Brexitimut taasinissaq Mayip kinguartippaa

Tuluit ministeriunerat, Theresa May uppernarsaavoq brexitimut marlunngorpat taasinissaraluaq kinguartinneqartoq.

Tuluit ministeriunerat, Theresa May uppernarsaavoq brexitimut marlunngorpat taasinissaraluaq kinguartinneqartoq.

Naatsorsuutigineqareersutut Tuluit Nunaata ministeriunerata, Theresa Mayip, marlunngornermi tuluit inatsisartuisa brexitimut taasinissaat, ataasinngornermi ualikkut pisortatigoortumik kinguartippaa.

Tamanna pivoq tuluit inatsisartuini oqalugiarnermini.

- Isumaqatigiissut nikingassuteqarluartumik itigartitsissutigineqassaaq. Taammaammat aqagu taasinissaagaluaq kinguartipparput, May oqarpoq.

Tuluit inatsisartuisa isumaqatigiissut, Tuluit Nunaanni naalakkersuisut EU-llu akornanni isumaqatiginninniutigineqarsimasoq aqagu taasissutigisussaagaluarpaat.

Ataasinngornermi tuluit nutaarsiassaqartitsivii arlallit allapput taasinissaq pingaaruteqartoq Mayip kinguartinniaraa.

Taama nutaarsiassiisoqarnerup kingunerisaanik tuluit aningaasaataasa pundip naliga, juunimi 2017-imi appasinnerpaaffianiit suli nalikinnerulerpoq. Nutaarsiassaqartitsivik AFP taama allappoq.

Powered by Labrador CMS