Brask: Tusagassiorfinnut salluliortunut oqaaseqarusunngilanga

Kalaallit Nunaanni Danmarkimilu amerlasuut pissangallutik utaqqigaat akikitsumik timmisartortitseqatigiiffiup Greenland Express-ip Gert Braskip neriorsuineratut aallartinnissaa, taanna suli utaqqineqarpoq.
Aggustip 8-anni Greenland Express-imik isumassarsisoq aamma Strategic Partnership Director Gert Brask tv2.dk-mut neriorsuivoq Greenland Express quppernermini nittartakkami timmisartumik takutitsissasoq kingusinnerpaamik aggustip 18-ianni, taamanikkut Frankrigimukarami timmisartumik attartoriartorluni, timmisartorlu type suunersoq oqaatigiumanngilaa.
Tamanna tunuliaqutaralugu Sermitsiaq.AG-p piffissami kingullermi Gert Brask marloriarluni saaffigisarsimava ilaatigut paasiniarlugit timmisartup type sunaanersoq, billitsinut akit aammalu qaqugu siullermeersumik Atlantikioq qulaallugu ilaasunik timmisartuussisoqassanersoq.
Akissut naatsoq ersarissorlu
Maannalu aaqqissuisoqarfik akissutisivoq.
– Tusagassiortunut aviisinullu salluliortunut oqaaseqarusunngilanga, Gert Brask mail-ikkut naatsumik allappoq.
Maili nassiunneqarpoq check-in-dk, Danmarkimi angalanert timmisartuussisarnerlu pillugit qallunaat internettimi nutaarsiassaqartitsiviat siuttoq, sisamanngormat allammat Greenland Express-ip timmisartoq type taarserniaraa, timmisartortitseqatigiiffik pilersinniarneqartoq Island aqqusaarlugu Danmarkip Kalaallillu Nunaata akornanni timmisartuussisalerpat timmisartuussisalissappallu.
Marsimi Sermitsiaq,AG-mit apersorneqarluni Gert Brask oqarpoq Greenland Express-imut aningaasaliissuteqartut Hollandimeersuusut, Tuluit Nunaanneersuusut, Indiameersuusut Dubai-meersuusullu. Taakkualu millioninik marlunnik kisitsisitalinnik aningaasaliinissaminnut piareersimasut.
Greenland Express pillugu allaaserisat tamaasa atuakkit