timmisartortitseqatigiit
Brask silaannakkut angallannermi suliniuteqaqqittoq
Gert Braskip hollandermiut timmisartortitseqatigiiffiat Denim Air siorna suleqatigiunnaarpaa. Maannalu silaannakkut angallannermi suliniummik allamik aallartitseqqereerpoq. Check-in.dk taama allaaserisaqarpoq.
Gert Brask timmisartortitseqatigiiffimmi aallarterlaami Arctic Airwaysimi pisortaaninngorpoq. Nittartakkakkut nutaarsiassaqartitsivik check-in.dk taama allaaserisaqarpoq.
Suliffeqarfik Inuussutissarsiornermut aqutsisoqarfimmi januaarip ulluisa arfernanni 2017-mi nalunaarsoneqarsimavoq, ilaasartaammillu ingerlatsisussatut siunertaqarluni.
CVR-p allaqqasuutai malillugit suliffeqarfik Sky Greenland Aps-imit tunuliaqutaqarpoq.
Ateq ingerlaqqittoq
Ingerlatsivik Denim Air mass lease ApS pinngitsaalillugu unutsinneqartoq Sky Greenland Aps-imik aamma taaguuteqarnikuuvoq.
Atuaruk: Tusagassiivik: Gert Braskip timmisartukkut angallassinermut aallartisaanera taamaatippoq
Ingerlatitsivik Denim Air hollandermiunik pigineqartoq Gert Braskip check-in.dk-mut paasissutississutigaa.
Denim Air-lu Gret Braskimit piaartumik suleqataajunnaarnerata kinguninngua ingerlatitsivik hollandip eqqartuussivianit akiliisinnaajunnaartutut nalunaarutigineqarpoq. Tamanna siorna novembarip qaammataani pivoq.
Braski piginneqataannginnerarpoq
Arctic Airwaysip Brask Invest Holding ApS piginnittoraa. Gert Braskili pisortaanertut taamaallaat atuuffeqarluni piginneqataananilu check-in.dk-mut oqaatigaa.
Atuaruk: Braski niuerniaqqittoq
Brask Invest Holding nalunaarsuiffik CVR malillugu arnanik marlunnik piginnitseqarpoq. Taakku Gert Braskip panigigai Randersimilu Gert Brask adresseqatigigai check-in.dk-p paasissutissiissutigaa.
Gert Braskilli "nunanit allanit aningaasaleeqataasoqartoq" nittartakkatigut nutaarsiassaqartitcivimmut naqissuserpaa.