Greenland Express Air
Brask: Denimilu ajornartorsiutigisavut aaqqippavut
Greenland Express Air aamma Denim Air ACMI suleqatigiinniarnissamut ajornartorsiuteqarnerat ilisimaneqarpoq, ajornartorsiutilli iluarsineqassasut naatsorsuutigineqarpoq
Timmisartuutileqatigiiffiup Greenland Express Airip suleqataallu Denim Air ACMIp suleqatigiinniarnermikkut ajornartorsiuteqartut KNR-imit saqqummiunneqarpoq. Gert Brask oqarpoq timmisartuutileqatigiiffimmik allamik suleqatigisinnaasamik ujarlertariaqarlutik pissutsit imaaginnassappat. Timmisartuutileqatigiiffik suleqatigineqartoq Denim Air ACMI-mi sulisorineqartut ajornartorsiutigineqarput.
Gert Brask ilaatigut oqarpoq imaassinnaasoq timmisartuutileqatigiiffik akiliisinnaajunnaarluni unittariaqalissasoq.
Greenland Express Air aallartikkamili arlaleriarluni kinguaattuunngikkuni uniinnartariaqartarsivoq. Ajornartorsiut Denim Air ACMI-mit pisortaaneranit oqaatigineqarpoq AG-mut.
- Greenland Express Airip akiliisinnaassusaa pissutaalluni timmisartuussinerit arlaqartut uniinnartariaqarsimapput. Timmisartuutileqatigiiffimmik aallartitsiniarnermi missingersuusiarineqartut annertunerusut ilisimaneqarsimanngilaq, Ronald Janssen ch-aviation.comimut oqarpoq.
Tusagassiuutini oqallisinnginnissaq
Tamanna pillugu Sermitsiaq.AG-ip Gert Brask oqaaserineqartumut isummeqquaa.
- Suleqatigut tusagassiuutitigut ajornartorsiutigut pillugit oqalliseqatigerusunngilagut. Nammineerluta ajornartorsiutigut iluarsiniassavagut.
- Denim Airimit oqaatigineqartut ilisimaaraakka, pisorlu pillugu oqaaseqaqqissanngilanga, Gert Brask oqarpoq.
Uniinnarnerit
- Timmisartuutileqatigiiffiup aallartinneranit qasseriarlusi uniinnartariaqarsimavisi?
- Maannamut sullissinermut naammagisassaanngilaq. Angallassinitta 70 procentii ingerlanneqartarput, 30 procentiilu uniinnartinneqarlutik.
- Assigiinngitsut pissutigalugit timmisartuussinissat unitsiinnarneqartarput. Pitsaanerusumik sullissisimasuugutta unititsiinnarnerit ilaat pinngitsoorneqarsimasinnaagaluaput. Tamakkuli ilinniutigaagut, aggustillu qaammataa naariarpat ajornartorsiutit iluarsineqarnissaat naatsorsuutigaarput, Gert Brask apeqqut akivaa.
Aningaasaqarneq iluarsineqartoq
- Greenland Express Air aningaasatigut qanoq tatisimaneqartigaa?
- Kingullermik oqaaseqarninni immaqa sukkavallaalaamik oqarsimavunga. Kangerlussuarmi Aalborgimilu unammilleqatigiinneq sakkortuvoq. Taamaattumik iliuusissamik nutaamik saqqummiussissaanga septembarip aallaqqaataani, Greenland Express Airip pisortaanera Gert Brask oqarpoq.
Sermitsiaq.AG-ip Denim Air ACMI-ip pisortaanera Ronald Janssen pissarsiariniartaraluarpaa iluatsitiffiunngitsumik.
Aviisimi saqqummersartumi AG-mi Greenland Express Air pillugu allaaserisaa atuarneqarsinnaavoq. Aviisi ataani pisiariuk: