Greenland Express Air

Brask: Attartortitsinerit nassiussisarnerillu neriuuteqarluarfigaagut

Taakku Greenland Express Airip kaaviiaartitaanut 30 procentimik iluaqutsiisinnaasut neriuutigineqarpoq. Ilaasukittoqarnerata nalaani isertitaqarfiulluarnissaat neriuutigineqarpoq

Greenland Express Airip pisortaa Gert Brask

Greenland Express Airimut inniminniinerit kisimik timmisartuutileqatigiiffimmut aningaasatigut isertitsissutaassanngillat.

Kalaallit Nunaanni, Danmarkimi Islandimilu timmisartuussinerit marlunngormat allartinneqarput.
Nassiussat angallanneqartarnerat isertitsilluaataasinnaanerat upperineqarpoq. Nassiussarineqartut tonsit pingasut nassarneqarsinnaapput, atorluarneqassasorlu timmisartuutileqatigiiffimmi pisortap Gert Braskip naatsorsuutigaa.

- Kalaallit Nunaannit Islandimut nassiussanik angallassisalernissamik soqutiginnittoqarluarpoq.

- Unammillertitsinnit akikinnerusumik angalasoqarsinnaavoq, taamatuttaaq aamma nassiussat akigitinneqartut appasinnerupput. Kalaallit Nunaannut nassiunneqartartut maannakkut annertugisassaanngillat, taamaattumik naatsorsuutigaarput nassiussanik angallassisalernissarput soqutigineqarluassasoq.

Imerpalasunik nassiussisarnerit immersueqataalluartarput, aammali elektroniskinik nassiussat aamma nassiussanut ilaasartut oqarpoq.

Attartortitsilluni angallassinissat neriuuteqarfiupput
Attartortitsinikkut angallassinerit aamma aningaasanit isertitsiffiulluarumaartut Greenland Express Airimit neriuffigineqarpoq.

- Attartortitsilluni angallassinissanik sisamanit isumaqatigiissusioreerpugut angallasserngaarnissarput suli piariinngitsorluunniit. Illersornissakkut suliaqartut timmisartumik attartussapput, aammalu Islandimut aasap ingerlanerani angallassisoqaqattaassalluni, Gert Brask nassuiaavoq.

Sapaatit marluk akunneri matuma siorna marloriarluni timmisartoq attartorneqartareersoq nalunaarutigineqarpoq.

Kaaviiaartitap 30 procentia ukioq manna
- Ilaasoqarpianngiffiata nalaani attartortitsinerit nassiussanillu angallassinerit kaaviaartitsinitsinnut pingaaruteqassapput, Gert Brask oqarpoq, nangipporlu:

- Aamma ataatsimik suli timmisartuuteqarpugut atorluarneqarsinnaasumik, Fokker 100-p saniatigut atorluarneqarsinnaasumik.

Timmisartuutileqatigiiffiup kaaviaartitsineranut nassiussanik angallassisarnerit attartortitsinerlu 30 procentimik tapertaajumaartut naatsorsuutigineqarpoq.

Greenland Express Air pillugu allaaserineqartut uani takukkit

Powered by Labrador CMS