Greenland Express Air
Brask: Aallaqqaataanit aallarteqqinnissarput aalajangerparput
Nutaanik aningaasaliisussanik pissarsiorlutik Greenland Express Airimi pisortaanerup Gert Braskip oqaatigaa. Islandimi mikkallartarunnaarnissaq aamma siunertarineqarpoq
- Suna tamaat allanngortinnialerparput. Islandimut mikkallartarnerit timmisartuutileqatigiiffimmut akisuvoq. Inniminniinerni suleqatigisartakkavut aamma aporfiupput, taakkumi Islandimit Danmarkiliartartunik suleqateqarput.
Greenland Express Airip pisortaanera Gert Brask timmisartukkut angallassinermut nutaarsiassiisartunut check-inn.dk-mut oqarpoq.
- Taamaattumik allamik iliuuseqarsinnaanngilagut, unikkallalaartariaqarpugut. Ilaasussat ikitsuinnaat eqqugaassapput - tamannali aamma sulissutigereerparput ilaatigut inniminniinerit ikitsuinnaat tunineritigut. Unikkallarnitsinni aallaqqaataanit aallarteqqinnissarput siunnerfigaarput. Nutaamik inniminniinermut akiliisarfeqalissaaq nutaamillu nittartagartaassalluta, Gert Brask check-inn.dk-mut oqaluttuarpoq.
Timmisartuutileqatigiiffik mailikkut septembarip 18-ani nassuiaateqarlutik ilaasunut nassiussinerminnut taama nassuiaateqarpoq. Tuluttuumit kalaallisuumut nassiussaq ima allaqqavoq:
'Asasagut Greenland Express Airimi angalaqataasut. Ajuusaarutigalugu nalunaarutigissavarput Greenland Express Airip angallassineri ingerlaannartumik unitsinneqarmata. Aalajangiineq utaqqiisaasumik aalajangiinerusoq nalunaarutigaarput. Nalunaarutigisinnaanngilarpulli qaqagu angallasseqqilissanerluta. Greenland Express Airip nalunaarutigaa, timmisartuussinissat tamarmik unitsinneqarmata'.
Angallassiisarneq allaanerusoq
Gert Braskip check-inn.dk-mut oqaatigaa timmisartuutileqatigiiffik allamik aamma timmisartumik pissarserusuttoq - timmisartoq Airbus A320. Taanna timmisartoq maannakkut timmisartumit attartorneqartumit Fokker-100-mit Danmarkimit Kalaallit Nunaannut toqqaannartumik angallassisinnaavoq, Islandimut mikkallaqqaarnissaq pisariaqassanani.
Timmisartuutileqatigiiffiup nammineq timmisartumik attartornissani anguniarpaa, taamaasilluni siunissami timmisartuutileqatigiiffimmik allamik isumaqatiginninniaqqaassanani, chech-inn.dk allappoq.
Denim Airip suleqatigiinneq naammagisimaarpaa
Timmisartuutileqatigiiffiup Hollandimeersup Denim Airip Greenland Express Airimik suleqateqarnini naammagisimaarlugu timmisartuutileqatigiiffimmi pisortaanerup Ronald Janssenip Sermitsiaq.AG-mut oqaatigaa.
Aallaqqaataanit aallarteqqinnissamut pilersaaruteqartoqarnera Gert Brask Sermitsiaq.AG-mut oqaaseqarusunngilaq. Sermitsiaq.AG-mit ilaatigut paaserusunneqaraluarpoq qaqagu angallassisoqaqqilissanersoq.