Greenland Express Air

Bosniamiut ajornartorsiortut Greenland Express Airimi timmisartuussissasut

Greenland Express Air kikkunnik timmisartuussisoqassanersoq sivitsortumi nalornissutigineqarsmavoq. Sermitsiaq.AG-ip oqaluttuarisinnaavaa suliffeqarfeeraq aningaasaqarnikkut annertuumik unammilligassalik Balkanimeersoq timmisartuussisuussammat

Assi toqqorsivimmeersoq

- Timmisartuutileqatigiiffik taannaassanersoq suli nalunarpoq. Suli allanik marlunnik periarfissaqarpugut.

Taama oqartoqarpoq Sermitsiaq.AG-p Greenland Express Airimi pisortaaneq Gert Brask aperimmagu Portugalimeersoq White Airways angalatitsiviup Kalaallit Nunaata Danmarkillu akornanni timmisartuussineranik isumaginnittuussanersoq. Gert Brask tamanna sioqqullugu kingornalu paasissutissanik isertuussilluinnarpoq timmisartuutileqatigiiffiullu sorliunissaa Greenland Express Airip timmisartuussinissamut pilersaarutaanut ilanngullugu aatsaat tamanut saqqummiunneqarumaarnera aalajangiusimallugu.

Taamaakkaluartoq timmisartuutileqatigiiffik sorleq Greenland Express Airip timmisartuussineranik isumaginnittuussanersoq Sermitsiaq.AG-p oqaluttuarisinnaavaa.

Pineqartoq tassaavoq BH Airlines, Bosnia-Herzegovinami illoqarfiit pingaarnersaanni Sarajevomi angerlarsimaffeqartoq. Tamanna Trafikstyrelsip Greenland Express Airip Kalaallit Nunaata Europallu akornanni timmisartuussisaleqqinnissamut akuersissutaani juulip 2-ani tunniunneqartumi takuneqarsinnaavoq.

Akuersissut BH Airlinesimut tunniunneqarpoq, taamaattumillu Bosniamiunik suleqateqaneq atorunnaassagaluarpat Greenland Express Air qinnuteqaateqaqqittariaqalersinnaassalluni.

Atuaruk: Greenland Exress Airip timminissat tamaasa taamaatippai

Atuaruk: Pisortat kukkunerat Greenland Expressimut kinguaattoortitsivoq

Suliffeqarfeeraq aningaasatigut annertuumik ajornartorsiortoq

BH Airlinesip taamaalilluni Hollandimeersoq Denim Air, Greenland Express Airip ilaasuinik siusinnerusukkut timmisartuussisarsimasoq, taarsertussanngorpaa.

BH Airlines maannakkorpiaq marluinnarnik timmisartuuteqarpoq. Timmisartoq sarpilik anginngitsoq Airbusilu annerumaaq, Gert Braskip aaqqiissutissat pitsaanersaattut siusinnerusukkut oqaatigisaa. Timmisartoq sarpilik ilaatigut Sarajevop Københavnillu akornanni timmisartuussinermut atorneqartarpoq, tassanilu januaarimi 2013-imi mittarfimmit saarlisoorluni.

BH Airlinesilli ajornartorsiutiginerpaasaa tassaavoq aningaasaqarneq. 2013-imi Østrigimi aningaaserivimmut akiitsuminik millionilinnik paarsinerlunnini tunngavigalugu timmmisartuussinissamut inerteqquteqarfigineqalerpoq. Aningaasaliissutissanik nutaanik pissarsiniarnermi ilaatigut piginneqataassutit 49 procentii Turkish Airlinesimut tunineqarput. Tyrkiamiulli suleqatigiinnermit tunualertorput, tamannalu Turkish Airlinesimi tusarfiup Sermitsiaq.AG-mut pisinerup akilersinnaalerumaarneranik upperinninnginnermik pissuteqarnerarpaa.

Akiligassat millionillit akilerneqanngitsooqqittut

Unammilligassat ukioq manna aamma malunnarluarsimappput, suliaqarfik pillugu nittartagaq CH Aviation timmisartuusseqqusiunnaarneq nutaaq pillugu marsimi nalunaaruteqarmat. Tamanna akiligassat millionillit piffissaq eqqorlugu akilerneqanngitsooqqissimanerannik pissuteqarpoq.

Sermitsiaq.Ag oqarasuaatikkut emailikkullu BH Airlinesimut attaveqarniarsimagaluarpoq, suliffeqarfilli saaffiginnissutinut suli akissuteqarani,

Greenland Express Airip pisortaanera Gert Brask Sermitsiaq.AG-mit piffissami sivitsortumi apersorneqarumasimanngilaq.

Greenland Express Air pillugu allaaserisat maani atuakkit

Powered by Labrador CMS