kommunip avinneqarnissaa
Borgmesteriusimasoq: Qeqertarsuup Tunua kommuninngortinneqarli
Qasigiannguit borgmestererisimasaata, Kâlêrak' Heilmannip, maanna sakkortunerpaamik kaammattuutigaa Qeqertarsuup Tunuata kommunitut ataatsitut inissinnissaa Qaasuitsup Kommuniata kommunip avinnissaa pillugu ataatsimiisitsisarnerit ingerlatereeraalu
Qasigiannguani borgmesteriusimasup, Kâlêrak' Heilmannip, 1997-imiit 2001-imut Qasigiannguani borgmesteriusup, kommunalpolitikerit nunalu tamakkerlugu politikerit Qaasuitsup Kommuniata avinneqarnissaanut oqallinnermi eqqarsarluarnissaanik kaammattorpai.
Qaasuitsup Kommuniani innuttaasut kommunip avinneqarnissaanut isumasiuilluni taasitinneqarmata amerlanerussuteqarluartut avinneqarnissaa kissaatigaat.
Tassa 81 procentit avinneqarnissaa kissaatigigaat, taamaallaat 19 procentit avinneqarnissaanut naaggaarmata.
Naalakkersuisuutitaqartut innuttaasut taasereernerat ataqqillugu Qaasuitsup Kommuniata avinneqarnissaa sulissutigineqassasoq naammassineqarlunilu Naalakkersuisooqatigiinnerminni isumaqatigiissumminni isumaqatigiissutigaat.
Maannalu Qaasuitsup Kommmuniata illoqarfinni inoqarfinnilu tamani innuttaasunik ataatsimiisitsinerit ingerlatilersimavai kommuunip qanoq avinneqartariaqarneranik innuttaasunut tusarniaaviusut.
Atuaruk: Qaasuitsup Kommunia avinneqassaaq
Suleqatigiittoqarnissaanut kaammattuivoq
Qasigiannguit borgmestererisimasaata, Kâlêrak' Heilmannip, isumaqarpoq pissusissamisuunngitsoq innuttaasut aperineqassappata Qeqertarsuup Tunuani illoqarfiit sorliit ataatsimoorunik pitsaanerunersoq.
- Tassalu imatut paasisariaqarluni Qeqertarsuup Tunuani kommuunimut qinikkat suleqatigiissinnaanermik pigisaqanngissutsip aqqani Qeqertarsuup Tunuani kommuuniusimasut aggulunniaraat.
Kâlêrak' Heilmann taama allappoq.
Kâlêrak' Heilmannimi isumaqarpoq taarsiullugu Qeqertarsuup Tunuani kommuni ataasiusoq ataatsimoorfiusinnaasorlu pilersinneqartariaqartoq.
- Ernersiassarsiorneq piunnaarlugu suleqatigiissinnaanerup avitseqatigiissinnaanerullu aqqani kommuuni ataaseq pilersinneqarniarli, Kâlêrak' Heilmann allappoq.
Qaasuitsup Kommuniani kommunalbestyrelsip, kikkut tamat oqartussaaqataanerat, kommune, attaveqatigiinneq attaveqaatinullu ataatsimiisitaliap innuttaasunik ataatsimiisitsinermi inernerit suliarereerpagit, kommuunip avinneqarnissaanut apeqqut oqaluusereqqissavaa.
Atuaruk: Qaasuitsoq: Kommunep avinnissaa amerlanerussuteqarluartut taperserpaat