Skip to main content

Borgmesterit: Mittarfiit nalornissutaanissaannut nunarput akissaqanngilaq

Nunatsinni borgmesterini tallimaasuni pingasut, kommunerisaat mittarfiliornissani kalluarneqartut, ataatsimoorussillutik nalunaaruteqarput nunarput mittarfiit nalornissutiginissaanut akissaqanngitsoq.

Sermitsiaq.AG-mit allaaserineqareersimasutut mittarfissualiornissamik suliariumannittussarsiornerit aamma aningaasaliisussarsiornerit Kalaallit Airportsimit unitsikkallarneqarnikuupput, Kalaallit Airportsip Nuummi Ilulissani mittarfissualiassanut politikkikkut isummertoqarnissaa utaqqimaaqqaarniarmagu.

Tamanna pivoq Partii Naleqqap mittarfissualiassat pillugit sanaartornissamut inatsisissaq pillugu Inatsisartut siullermeerinneranni kissaatigimmagu misissorneqartariaqartoq inuiaqatigiinnut aningaasaqarnikkut Ilulissani aamma Nuummi mittarfissuassatut pilersaarutit 2200 meteriutinnagit 1200 meteriutinneqarpata, kiisalu Qaqortumi mittarfissaq 1500 meteriuppat.

Avannaa: Ataasiakkaat soqutigisatik aalluppaat

Tamatuma kingorna nunatsinni borgmesterini tallimaasuni pingasut, kommunerisaat mittarfissualiornissami kalluarneqartussat, pilersaarutit malillugit aalajangiisoqarnissaanut nukingisaarisarsimapput.

Taakkuami isumaqarput kommunerisaminni inuussutissarsiornermik suliaqartunut suliffissaqarniarnermullu mittarfissualiassat pilersaarutit malillugit suliarineqanngippata kinguneqarnerlukkumaartut.

- Nunatsinni angallannikkut attaveqaatit pitsaanerusut pisariaqartinneqarnerat misissuinerpassuit takutittareerpaat, Inatsisartunilu amerlanerussuteqarluinnartut siusinnerusukkut tapersersuinerminnik takutitsisareerput. Taamaammat qinikkat ataasiakkaat namminneq soqutigisatik pillugit aalajangiinissanik pisariaqarluinnartunik kinguarsaalernerat takullugu nikalluallannanngitsuunngilaq, Avannaata Kommuniani borgmesteri, Siumumeersoq Palle Jerimiassen oqarpoq.

Asii: Nunatta siunissaa nalorninartorsiortinneqarpoq

Kommuneqarfik Sermersuup borgmesteria Asii Chemnitz Narup isumaqarpoq nuna tamakkerlugu qinikkat nunatta siunissaanik navianartorsiortitsisut.  

- Nuummiinnaq namminersorlutik aningaasaliisartut milliardit sinnerlugit aningaasaliisimapput, mittarfiillu sanaartorneqanngippata aningaasaliinissaraluit maangaannartinneqassapput. Taamaattoqassappat suliffiit nutaat 400 annaassavavut, Kommuneqarfik Sermersuup borgmesteria Asii Chemnitz Narup oqarpoq eqqaasitsillunilu namminersorlutik aningaasaliisartut nunatsinni takornariartitsinermik inuussutissarsiornermillu inerisaaniarnerat ulluinnarsiutaanngitsoq.

Kujallermi borgmesteri: Siunnisssarput nalorninartorsiortipparsi

Kommune Kujallermi borgmesteri Kiista P. Isaksen isumaqarpoq qinikkat mittarfiliortiterinernik nalornisitsilersut kommunimi siunissaa pillugu nalorninartorsiortitsilersinnaasut.  

- Kujataani ukiorpassuanngortuni angallannikkut attaveqaatit pitsaannginnerat assorsuaq naalliuutigisimavarput kingunerilu atukkavut ilungersunaqaat  Angallannerup aalaakaannginnera billetsillu akisunerujussuat pissutigalugit amerlaqisut kommunitsinnut nuunngitsoortarput, taamaaqataanillu inuussutissarsiutinik ingerlatsisortavut attaveqaatit pitsaannginnerannit angallassisinnaanerullu amigarneranit atugarliortitaaqaat, Kiista P. Isaksen oqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER