Borgmesterit: Kommunini sulisunut pasilliutit alianartut

Sermitsiaq.AG-mi ataasinngormat allaaserineqartutut Inatsisartuni ilaqutariinnermut peqqissutsimullu ataatsimiisitaliaq Qaasuitsup Kommunianut Qeqqatalu Kommunianut isumaginninnikkut nakkutilliiartorsimanerit inernerinut annilaartinneqarpoq.

Tamanna pivoq ilaqutariinnermut peqqissutsimullu ataatsimiititaliaq ilaqutariinnermut, naligiissitaanermut isumaginninnermullu naalakkersuisumit, Siumumeersumit Martha Lund Olsenimit Qaasuitsup Kommuniani Qeqqatalu Kommuniani isumaginninnikkut nakkutilliiartorsimanerit pillugit ilisimatinneqareersorlu.

- Pisuni aalajangersimasuni inatsisinik unioqqutitsisoqarsimasoq ataatsimiititaliamut paasissutissiissutigineqarpoq. Meeqqanik inuusuttunillu sakkortuumik sumiginnakkanik nalunaarutiginninnerit kommunit ajoraluartumik iliuuseqarfigisarsimanngilaat, Inatsisartut ilaqutariinnermut peqqissutsimullu ataatsimiititaliaata siulittaasua, Demokraatineersoq Tillie Martinussen tusagassiuutinut nalunaaruteqarluni ataasinngormat taama allappoq.

Tillie Martinussenilu nangilluni ima allappoq:

- Ilaqutariinnermut, naligiissitaanermut isumaginninnermullu naalakkersuisoq naapertorlugu ataatsimiititaliap paasivaa pinerluttulerinermi inatsimmik unioqqutitsisoqarsimasinnaanerata nalilerneqarnissaa siunertaralugu politiit attavigineqarsimasut.

Atuaruk: Kommunit meeqqanut inuusuttuaqqanullu sumiginnaanerannut ataatsimiisitaliaq annilaartoq

Kommunit nalunaarusiaq takusimanngilaat
Kommuneqarfiit kattuffiata, Kanukokap, siulittaasua, Siumumeersoq Martha Abelsen, nunatsinni kommunit sisamaasut borgmesterii sinnerlugit allattoq naapertorlugu, nakkutilliinermit nalunaarusiaq, Martha Lund Olsenimit Inatsisartuni ilaqutariinnermut peqqissutsimullu ataatsimiisitaliamut saqqummiunneqarsimasoq, kommunit pineqartut marluk takusimanngilaat utertitsiffigisimanagulu.

- Alianarpoq kommunini sulisorpassuit pinerluttunngortinneqarmata, pinerluttulerinermi inatsimmik unioqqutitsisuunerarlugit, meeqqanut inuusuttuaqqanullu tunngasumik nakkutilliinermi suliaq ataaseq tunngavigalugu.

Taama Martha Abelsen nunatsinni borgmesterit sisamaasut sinnerlugit allappoq.

Imalu nangippoq:

- Erseqqissarneqassaaq nakkutilliisuutitat kommuninik, kommunini sulisunik imaluunniit innuttaasunik ataasiakkaanik politiinut tunniussisinnaanngimmata. Nakkutilliisuutitat kommuninik taamaallaat Kommunit Nakkutilliisoqarfiannut suliassanngortitsisinnaapput.

Atuaruk: 'Meeqqat sumiginnakkat' pillugit suliniuteqarnermi politikkikkut suleqatigiinneq

Borgmesterit: Martha Lund Olsen eqqortuliorpa?
Borgmesterillu soqutiginartippaat paasissallugu isumaginninnermut naalakkersuisoqarfik nakkutilliisarnernut aalajangersakkat naapertorlugit qisuariarsimanersoq.

- Periaasissatut aalajangersagaasut paasisinneqarnerput naapertorlugu malinneqarsimanngillat, Inatsisartut ilaqutariinnermut peqqissutsimullu ataatsimiititaliaat nalunaarusiamik suliluunniit kommunini tiguneqarsimanngitsumik saqqummiivigineqarsimammata. Suliani nalunaarusiap kommuninit tiguneqareerfigisimasaani takuneqarsinnaanngilaq ilaqutariinnermut isumaginninnermullu naalakkersuisoqarfiup kommuninit paasissutissanik piniarsimasinnaanera, nalunaarusiami fagitigut pissusiviusunillu tunngaveqartumik kommuninit iliuusaasut pillugit.

Taama borgmesterit allapput, taakkualu sakkortunerpaamik naqissuserpaat meeqqanik paarsinerlunnerit atornerluinerilluunnit akuerineqarsinnaanngilluinnarmata.