Kommune Kujalleq

Borgmesterip siunissaq pillgu ilinniartut oqalliseqatigigai

Campus Kujallermi atuartut 100 sinnillit kommunip siunissaa pillugu borgmester Jørgen Wæver Johansenip (S) oqaloqatiginissaa siunertaralugu innuttaasunik ataatsimiititsinermut takkupput

Kommune Kujallermi borgmesteri, Jørgen Wæver Johansen (S), Campus Kujallermi ilinniartut pingasunngornermi oqalliseqatigai

Sapaatip akunnerani kingullermi kommunimut pilersaarummik aaqqissugaanikkut suliniutinik aammalu innuttaasut atugaannik sammisaqarfiusumik Kommune Kujallermi suli innuttaasunik ataatsimiititsisoqarpoq.

Qaqortumi ilinniarnertuunngorniarfiup inersuaani tamanna pivoq.

Meeqqat atuarfiat isornartorsiorneqartoq
Oqallittoqarnerani meeqqat atuarfiat annerusumik sammineqartoq, kommuni ilisimatitsivoq.

- Tamatumani inuusuttut qassiit misigisartakkaminnik oqaluttuarput. Qassiit meeqqat atuarfianniit ilinniarnertuunngorniarfimmut niuernermilluunniit ilinniarfimmut ikaarsaarnerminni qanoq uisaallassimatigalutik oqaluttarput, inuusuttullu isornartorsiuineranni meeqqat atuarfianni ilinniartitsisut assorsuaq isornartorsiorneqarput, kommuni nittartakkamini allappoq.

Meeqqat atuarfiat pillugu oqallinneq inituvoq, borgmesterillu inuusuttut peqatigalugit nassuerutigaa meeqqat atuarfiat immikkut suliniarfigisariaqarmat.

- Meeqqat atuarfiat assut isiginiarparput, nukinnillu pisariaqarnera malillugu atuiffigineqarnissaa qularnaassavarput, borgmesteri nassuiaavoq.

Kulturi soqutiginnilersitsissaaq
Sammisat annertuut allat tassaapput suliffissaaleqineq piitsuussuserlu. Suliffissaaleqineq eqqarsaatigalugu inuusuttut qassiit erseqqissivissumik isumaqarput suliffissaaleqisut sulilersinniarneqartariaqarmata aammalu massakkornit annerusumik inunnik sullissivinni kommunimilu suliffeqarfinni atorluarneqarnerusariaqarmata.

Sammisassaqarfiit amigaataanerat inuusuttuniit borgmesterimut assut eqqartorneqarpoq.

Innuttaasut illuat, isiginnaartitsisarfik filmertarfilluunniit pitsaasut pisariaqartinneqarnerat oqaatigineqarpoq. Ilinniartoq inuusuttoq isumaqarpoq naluttarfik kommunitsinnut assut ullumikkornit kajungernarnerulersitsissasoq.

Innuttaasunik ataatsimiititsisoqaqqissaaq
Qinikkat allat suleqatigalugit isumassarsiat sulissutigineqarnissaat oqaluuserineqarnissaallu borgmesterip isumagissallugit neriorsuivoq, aningaasaqarnerli aamma ajornakusoorsimasoq massakkulli pitsanngoriartulersimasoq erseqqarissarpaa.

Borgmester Jørgen Wæver Johansen aammalu pilersaarusiornermut pisortaq Birger Kristoffersen suliaqaqatigiikkuutaanut ataasiakkaanut sammisumik, soorlu meeqqat atuarfianni Piareersarfimmilu ilinniartitsisunut atuartunullu kiisalu inuussutissarsiorfinni assigiinngitsuni atorfilinnut sammisumik ataatsimiititsisalernissamik pilersaaruteqarput.

Powered by Labrador CMS