Sermersooq
Borgmesterip sinniisussaa: Ineriartortitsineq illoqarfinnut allanut aamma iluaqusiissaaq
Illoqarfiit pingaarnersaanni illoqarfiup ineriartortinnissaanut suliniut kommunimi tamanut iluaqusiissaaq, Kommuneqarfik Sermersuumi borgmesterip sinniisussaa siulleq, Justus Hansen oqarpoq
Kommuneqarfik Sermersuup marlunngornermi Nuup ineriartortinneqarnissaanut pilersaarusiaq saqqummiuppaa.
Illoqarfiup immikkoortortassaa, Siorarsiorfik, ilaatigut saqqumminneqarpoq.
Illoqarfiup pingaarnersaanni ineriartortitsinissamut suliniutip nutaap, Nuummi kisimi iluaqutaassanngilaq, kommunimi borgmesterip sinniisussaa siulleq, Justus Hansen (D) oqarpoq.
Atuaruk: Illoqarfiup immikkortua nutaaq sullorsuarmik Nuummut atassuteqassaaq
Illoqarfinnut allanut iluaqutissaq
Nuummi illoqarfiup ineriartortinneqarnissaani kommunimi tamanut iluaqutissanik taakkartuivoq.
- Namminersortut Nuummi aningaasaliiniarlutik soqutiginnittut amerlapput. Tamannalu pissutigalugu illoqarfinni allani, Nuup avataaniittuni oqartussat aningaasaataasa atorneqarnissaat periarfissaalluni. Atuarfinnik meeqqallu paaqqinnittarfiinik nutaanik Kommuneqarfik Sermersooq nammineerluni Nuummi sanaartussagaluaruni tamanna sanaartugassanut missigersuutinik, ukiut tulliuttut arfinillit arfineq marlulluunniit tungaannut atugassanik naleqassagaluarpoq, tusagassiuutinut nalunaarummi allappoq.
- Aningaasaliissutilli piffissamut sivisunermut atugassanngortikkaanni, tamanna kommunimut tamarmut ataatsikkut kivitsinerussaaq tassa aningaasaqarnermut aamma sulisunut pitsaaasumik atugassaqartitsilerluni, Justus Hansen erseqqissaavoq.
Atuaruk: Nunatta oqaluttuarisaanerani inissianut pilersaarut annerpaaq
Illoqarfiit pingaarnersaat nukittooq
Justus Hansen Tasiilami najugaqarpoq. Illoqarfiit pingaarnersaat Nuuk nukittorsarneqarpat, tamanna illoqarfinnut Nuup avataaniittunut aamma nukittorsaaqataassasoq, taanna isumaqarpoq.
- Nunatta tamarmi pisariaqartippaa illoqarfiit pingaarnersaat nukittooq. Kommuneqarfik Sermersuumilu illoqarfiit pingaarnersaata nukittunissaa kommunimi illoqarfinnut allanut pingaaruteqarpoq. Akileraarutinit pissarsiarineqartartut amerlanerpaartaat Nuummi akiliutigineqartarput, tamannalu pissutigalugu kommunimi tamarmi innuttaasut pitsaasumik sullinneqarlutik. Tamassumalu peqatigisaanik uangut politikeriusugut innuttagut qinigassartittariaqarpavut soorlu inissianik sanaartornikkut taamaalillutik innuttaasut namminneerlutik toqqarsinnaallugu sumi najugaqarusunnerlutik, Justus Hansen oqarpoq.
Aamma atuakkit:
Nunatta eqqumiitsulianik katersugaasivissaata isikkussaa takuuk
Titartaasartup tusaamasap issittumi arsaattarfissuaq titartarpaa