Angallanneq
Borgmesterip Sarfaq Ittuk Upernaviliartittalerusuppaa
Kiffiartuussinissamut isumaqatigiissutit nutaat innuttaasut pisariaqartitaat naammassinngilaat, Ole Dorph naqissusiivoq
Namminersorlutik Oqartussat angallannermi kiffartuussinissamut isumaqatigiissutaannut tunngatillugu, Qaasuitsup Kommuniani borgmesteri Ole Dorph, Kommune Kujallermi borgmestereqatini assigalugu tupaallappoq.
Atuaruk: Ilaasut timmisartorlutillu umiarsuartassapput
Pitsaassusaat naammanngitsoq
Isumaqatigiissutit nutaat umiatsiamik angallassinerulernissaq siunniuppaat, qulimiguulimmik angallassinermik ilaqartut, innuttaasut pisariaqartitaannik naammassinninnissamut pitsaasuunngillat, borgmesteri uparuaavoq.
Atuaruk: Kommune Kujalliup kiffartuussinissamut isumaqatigiissut dumpertippaa
Tamannalu pissutigalugu isumaqatigiissutit qanoq ilusilersorneqarnissaannut kommuni ilanngunneqarsimanngimmat, Ole Dorph pakatseqqavoq.
Oqaloqatigiinnissamik neriuuteqaraluartoq
- Kommunalbestyrelsip kissaatigisimavaa, Naalakkersuisuniit ingerlaannartumik Qaasuitsup Kommunia angallannermi akeqartitsinerup, silaannakkut imaatigullu angallanerip akulikinnerusinnaaneranik eqqartuinermi peqataatinneqarnissani, borgmesteri naqissusiivoq.
- Tamanna patsiseqarpoq, silaannakkut angallassinermi akit qaffasinnerujussuisa isertitakinnerusunut akissaqartitsinngitsunut tikinneqartarnerullu akuttuneranik iluarisimaarinnginneq, taanna oqarpoq.
Atuaruk: Knud Kristiansenip ilaasunut ingerlaqqissinnaanngitsunut aaqqiissummut ammaassivoq
Takornariaqarneq eqqorneqartoq
Tassunga tunngatillugu Ole Dorphip tikkuarpaa, Qeqertarsuup Tunuani tikittarnerit aallartarnerillu amerlinavianngitsut - naak takornarissat amerlanerusut tikittaleraluartut.
- Tamannalu akueriuminaallunilu ajuusaarnarpoq, naak takornariaqarneruleraluartoq akilersinnaassusialu anneruleraluartoq, soorlu aamma Naalakkersuisut sikoqartarnera qanoq ulorianartigisarnera eqqaarsaatigisimanngilaat, borgmesteri uparuaavoq.
Upernavimmut
Uummannami, Upernavimmi aamma Qaanaami innuttaasunut angallannermi pitsaanerusumik aamma Ole Dorph ujartuivoq. Tamannalu tunngavigalugu siunnersuutigaa, Arctic Umiaq Linep sinersortaataata, Sarfaq Ittuup, angalasarnini avannamut tallisissagaa, Kangatsiaq, Qasigiannguit, Qeqertarsuaq, Uummannaq aamma Upernavik tikittalerlugit.
- Taamaasilluni nunaqavissut takornarissallu isumannaatsumik angalasinnaanerat qulakkeerneqarsinnaammat, borgmesteri erseqqissaavoq.
Assit takukkit: Qaqortumi akerliussutsimik takutitsisut aatsaat taama amerlatigisut