eqqaaniut
Borgmesteri: Tatta annertuunik eqqarsaasersornissaminut qununngitsuuvoq
Borgmester Asii Chemnitz Narup, Kommuneqarfik Sermersuumeersoq, Hans Pavia Egede pillugu eqqaaniuteqarpoq - amerlasuunit Tattamik taagorneqartarpoq - taanna ataasinngornermi 63-nik ukioqarluni toquvoq.
- Hans Pavia Egede Nuummiuusimavoq isumassarsiarpassualik iliuuseqallaqqissorlu, annertuunik eqqarsaatersuuteqarnissamut qununngitsoq. Inuuneranut illoqarfitta pingaarnersaat qitiusimavoq. Nuummi inunngorsimavoq, Nuummi alliartorsimavoq Nuummilu malunnaatilimmik sunneeqataasimalluni. Nuup Kommuunerisimasaani kommunalbestyrelsemi ilaasortatut, illoqarfiup ineriartorneranut annertuumik sunneeqataasimavoq, eqeersimaartutut siuariartorfiusutullu Nuuk pingaarnertut illoqarfinngorneranut suleqataasimalluni, borgmesteri allappoq, taanna inuusimavoq inunnut akulerusimasuunissaminut nuannarisalik.
Asiit Chemnitz Narupip Hans Pavia Egede inuttut paasisaqarumatuutut, suleriallaqqissutut, tunniusimasutut inuiaqatigiilerinermillu soqutigisalittut aallarnisaasutu politikeritullu niuertutullu eqeersimaartutut eqqaamarusuppaa.
Inuk pissanganartoq
- Nuummi ineriartorneq siuarsaaqataaffigaa, Kalaallillu Nunaata aningaasaqarnikkut ineriartortinneqarnera peqataaffigaa, aallarnisaasutut isumassarsiortutullu, borgmesteri eqqaaniummi allappoq, tassanilu inuk pissanganartuunerarlugu oqaatigaa, Tatta angisuunik eqqarsaasersioriallaqqissuusimavoq.
Eqqaaniut tamaat uani atuaruk