Borgmesteri: Nuuk kajungernassuseqaqaaq

Ukiormi kingullermi Qeqqata Kommuniani innuttaasut 184-nik ikileriarput, januaarip aallaqqaataani inuttaasut 9.239-t kommunimi najugaqarput.

Innuttaasut ikileriarnerat sumik pissuteqarnersoq, Sermitsiaq.AG-p borgmesteri Hermann Berthelsen (S) aperaa.

Taanna tunngavilersuilluni akissuteqarpoq, Qeqqata Kommunianilu illoqarfinnut nunaqarfinnullu ataasiakkaanut pilersaarutit akissuteqarfigalugit.

Atuaruk: Nuummi innuttaasut amerleriarujussuartut

Sisimiut:
- Ukiut kingulliit suliffiit, soorlu Pisiffik, nutserisunngorniarneq il.il. Nuummut nuunnerata sunniutai suli malunniuteqarput inukinnerulaalersitsillutillu, Hermann Berthelsen oqarpoq.

Illoqarfimmi sanasut Nuummut nuuttartut taassuma erseqqissaatigaa.

- Nuummi sanaartornerujussuup, umiarsualivik, isertitsivik inissiat il.il. sanaartornermik ilinniagallit arlallit Nuummut nuunnerannik kinguneqarpoq. Tassanimi akissarsiorluarnerujussuusinnaagamik, borgmesteri oqarpoq.

Sisimiuni kisianni arlalinnik pilersaaruteqartoqarpoq.

- Sisimiuni sanaartukkat suliniutillu allat suli ingerlapput. Taakkulu ukiuni tulliuttuni sunniuteqassapput inoqarnerulersitsillutillu: Aalisakkanik suliffissuit, innarluutilinnut sungiusarfik, inissiat nutaat, KTI-mi annertusaanerit, Hermann Berthelsen oqarpoq.

Sisimiuniit Kangerlussuarmut nunaannakkut aqqusineq sananeqarpat kingusinnerusukkullu aqqusinivinngorluni, takornariaqarnikkut inuussutissarsiornikkullu allatigut annertuumik siuariaataasaaq.

Atuaruk: Innuttaasut ikiliartorput - borgmesterip naligiinnerunissaq piumasaraa

Maniitsoq:
- Suliffinnik Maniitsumiit nuussinerit neriuppugut unittut. Kommuunip suleqataaneratigut suliffinnik pilersitsisoqarpoq, soorlu Kanukoka, Hermann Berthelsen oqarpoq.

Aalisakkanik suliffissuaqarneq annertusivoq. Taakkulu sulisartunik aalisartunillu amerlanerusunik pisariaqartitsipput, borgmesteri ilisimatitsivoq.

Atuaruk: Avannaata siunissaa neriulluarfigineqartoq

Kangerlussuaq:
NaviAir-p Nuummut nuunnera nunaqarfimmut sunniuteqarpoq, Hermann Berthelsenillu DMI-p aamma Nuummut nuunnissaa ugguaraa.

- Umiarsualivimut Naalakkersuisut aningaasaliippata tamanna Kangerlussuarmut siuariaataassaaq, Qeqqata Kommuniani borgmesteri oqarpoq.

Hudson Ressources ukiormanna Kangerlussuup kangerluani ammassaaq, tamannalu Kangerlussuarmut iluaqusiissaaq.

Atuaruk: KANUKOKA: Suliffiit sinerissamut nuunneqarlik

Kangaamiut:
- Naalakkersuisut umiarsuliaveqarnikkut aningaasaliissuteqarpata inuttusiartorsinnaalissaaq, taanna oqarpoq.

Tamanna suliffissuaqarnikkut piorsaanermik malitsiqassammat, Hermann Berthelsen ilimasuppoq.

Sarfannguit aamma Atammik:
- Aalisagaqarluarnerata kingunerisaanik taakkunani inuttussuseq aalajaappoq.

Itilleq aamma Napasoq:
Hermann Berthelsen nunaqarfinni taakkunani marlunni aalisarnikkut periarfissaqarneraavoq.

- Inuttusiartornissaminnut suli periarfissaqarput aalisakkanik allanillu tunisssiorsinnaaneq aallaavigalugu, borgmesteri erseqqissaavoq.

- Napasup eqqaani aatsitassarsirfimmik pilersaaruteqartoqarnera iluatsissappat tamanna Napasumut iluaqutaasinnaalissaaq.

Kangerlussuup Itillillu Kangerluata akornanni aatsitasarsiorfik ukiormanna ammartussaq Itillermiunut iluaqutaasinnaanera periarfissaqarpoq.

Suliffiit siammarterlugit
Hermann Berthelsenillu naggataagut Jørgen Wæver Johansen taperserpaa, taassuma pisortat suliffeqarfiutaat sinerissamut siammarterneqarnissaat naatsorsuutigaa.

- Nunatsinni inuiaqatigiinni naligiittoqarnerulissaaq, tamannalu inuiaqatigiinnut iluaqutaassaaq, Hermann Berthelsen oqarpoq.

Atuaruk: Borgmesteri qinigassanngorteqqilinngitsoq