Borgmesteri: Meeqqanut tusarnaartassaagut

- Meeqqat tamarmik inuunerissuunissamut pisinnaatitaaffeqarput. Meeqqat pisinnaatitaaffiinik eqqortitsinermut tunngatillugu kiialu angajoqqaat inuiaqatigiillu pisussaaffinut akisussaaffiinullu tunngatillugu siuttoorusuppugut. MIO-p qissimigaartassagaatigut neriuutigaarput, kiisalu suleqatigiinneq meeqqat namminneerlutik inuunerminnut isiginneriaasaannik paasinniffiunerunissaa neriuutigaarput. Meeqqammi inuunnerinnerup suunera namminneerlutik nalunngilaat. Inersimasut uagut naalaartassavagut, uagulli akisussaaffimmik tigusisartussaavugut, Kommuneqarfik Sermersuumi borgmesteri Asii Chemnitz Narup oqarpoq.

Kommuneqarfik Sermersooq MIO-lu suleqatigiinnissamut isumaqartigiinneqaranni oqaaseqarpoq.

FN-ip meeqqat pillugit isumaqatigiissutaa aallaavigalugu meeqqat pisinnaatitaaffiisa patajaallsiarnissaat kiisalu Kommuneqarfik Sermersuumi meeqqat pisinnaatitaaffissa ilisimaneqarnerulernissaat suleqatigiinnissami siunertarineqarpoq. Suleqatigiinnikkut kommunimi politikerit, meeqqanik suliaqartut kiisalu inersimasut meeqqanut avatangiisaasut meeqqat pisinnaatitaaffiisa ataavartumik patajaallisaafigineqarnissaannut qulakkeerinneqataassaaq.

Kommuneqarfik Sermersuumi ilimagisat tusakkallu aallaaviginagit, piviusumik ilisimasat aallaavigalugit iluuseqartarnissaq kissaatigaarput. MIO ilisimasanik patajaallsiaasinnaallunilu Kommuneqarfik Sermersuumi meeqqat inuuniarnermikkut atugaat assigiinngeqisut paasinissaannut toqqammavissiilluarsinnaavoq. Tamanna politikeritsinnut aalajangiinialernermi patajaatsumik toqqammavissiissaaq, peqatigisaanillu meeqqanut inuusuttunullu tunngasuni suliniutissanut ineriartortitsinermillu isumassarsisitsissalluni. MIO-p siusinnerusukkut meeqqat pisinnaatitaaffii pillugit misissuisimanera kiisalu Kommuneqarfik Sermersuumi meeqqat pisinnaatitaaffii pillugit aalajaangersumik maanna ilisimasat kommnip nammineq pissarsisai, polikkikkut aaljaangiinermi toqqammaviusut.

Meeqqat illersuisuat suleqatigiinnissamik isumaqatigiittoqarnera nuannaarutigaa.

- Inatsisit inuunerullu ingerlarnani assigiinngisuseq unammilligassatsinni annersaavoq. Meeqqammi pisinnaatitaaffii meeqqerivinni, atuarfinni, sunngiffimmi ornittakkani, isumaginnittoqarfimmi, aammali inuusuttut imminerminnut tunngasunik aalajangiivigineqarnernimmut akuutinneqarnerisigit pisarput. Suleqatigiinnissaq neriulluarfigeqaara, neriuppungalu MIO ungasinnerusoq eqqarsaatigalugu nunatsinni kommunit sinnerinik pingasunik taamaattumik aamma suleqatigiissuteqalerumaarpoq, Meeqqat illersuisuat Aaja Chemnitz Larsen oqarpoq.