Siulittaasunngorniunneq
Borgmesteri Kim Kielsenimut tapersersuisoq
Qeqqata Komuniani borgmester Malik Berthelsenip Siumumi siulittaasunngorniuuttunut kimut illersuinini nassuerutigaa
Malik Berthelsen Kim Kielsenimut nangaassutiginngilluinnarlugu tapersersuivoq, Kim Kielsenillu Vittus Qujaukitsoq, partiip Sisimiuni pingasunngornermiit tallimanngornermut ataatsimeersuarnerani sisamanngorpat siulittaasunngorniuuteqatigisussaavaa.
"Unneqqarinneq"
Politikkikkut unneqqarinneq, tatiginassuseq innuttaasullu akornanni toqqissisimanissaq Nunatta ingerlanneqarnerani pingaarnerpaasut, KNR aallaavigalugu Malik Berthelsen Kim Kielsenimut tapersersuinerminut tunngavilersuivoq.
- Piaarnerpaamik namminiilivinnissamik taamaallaat siunertaqarluni siulittaasumik taarsiiniarneq isumaqarpunga tulluartuunngitsoq, innuttaasulluunniit oqaluttuussinnaanagit ukiumut 5 milliardit koruunit tungaannut suminngaanniit matussuserneqassanersut, Berthelseni KNR aallaavigalugu oqarpoq.
Siulini assigalugu
Taamaasilluni Malik Berthelsenip atorfimmini siulini Hermann Berthelsen massakkut partiip siulittaasuanut tapersersuilluni nalunaaruteqarsimasoq tapersersueqatigilerpaa.