Pinngortitami ajunaarnersuaq
Borgmesteri: Kikkut tamarmik eqqugaapput
Nuugaatsiami pisoq alianarluinnartuuvoq kikkunnillu tamamik tupatsitsilluni. Atuarfik pisiniarfillu piuneerussimapput, siunissamilu qanoq pisoqarumaarnera suli nalunarpoq.
Imaq qummukariarluni uteqqippoq, tamatuma kingorna Nuugaatsiami innuttaasut paasilersimavaat ajortoqartoq.
Iliuuseqapallanneq
– Nuugaatsiami alianaqisumik pisoqartoq paasingatsigut kommunalbestyrelsi kommuunimilu sulisut eqqugaasut pillugit qanoq ikiuisinnaanerluta paasiniarsimavarput. Kommunimit ikiuussinnaasut tamarmik Uummannamukartinneqarput, siulliillu angalanissaat unnuarli aallatinneqarsimallutik. Qaasuitsoq Avannarlermi borgmesteri Ole Dorph attortisimaaqisoq taama oqaluttuarpoq.
Illut arlallit, atuarfik pisiniarfillu imaanut amuneqarput. Tsunamip kingorna kallerup innera qamissimavoq, taamatullu nunaqarfimmi internetti attaveerussimalluni. Ajunaarnerlu ajornerujussuusimasinnaangaluarpoq. Umiatsiat Nuugaatsiamut tikiunniarsarisimangaluarput Illorsuillu tungaanut sikoqarnera pissutaalluni iluatsitsiffiusimanani.
Piffimmi sikoqartoq
– Piffimmi sikorsuaqarpoq, taakkuli malissuarmik nunaqarfimmut eqquisumut kingaallaataasinnaalluarput. Innuttaasut tamarmik Uummannamut qimarngunneqarsimapput, taakkuli inissiani inoqanngitsuni pisatsersorneqarsimasuni, ilaqutariinni inissiisarfinnilu allani inissinneqarallarsimapput. Ikiuiniarnermik suliaqarnerit tamarmik sukkasuumik pitsaasumillu suliarineqapallapput, taamaattoq nunaqarfik qanoq pissanersoq suli ilisimanngilarput. Eqqugaasut tamaviaarukkallassavagut, Ole Dorph oqarpoq.
Politiit, Issittumi Sakkutooqarfik, Namminersorlutik Oqartussat aammalu peqqinnissaqarfimmi suleqatigiinnerat pinasuartumik aallartinneqarsimapput. Kommunimi isumaginnittoqarfimmi sulisut Uummannamut tikereersimapput taakkua saniatigut tarnip nakorsai tallimat aamma tikisinneqarsimapput.
Kajumissusillit arlallit
– Kajumissutsiminnik ikiuuttut arlaqarput, eqqugaasimasulli ikiorserniarlugit suna tamaat sulissutigisimavarput. Eqqugaasut nerisassaannik atisassaannillu tuniumallugit pisiniarfiup ammatinneqarnissaa qinnutigisimavarput, Ole Dorph oqarpoq.
Taanna aamma Uummannamukarusuppoq, kisianni eqqugaasunut ikiuisinnaasut siulliullutik apuunnissaat taassuma pingaartinnersaavaa.