Kangerlussuaq
Borgmesteri Kangerlussuarmi umiarsualivimmik nutaamik ujartuisoq
- Aningaasaliissutit annikitsuinnaassapput, takornariaqarnermut siuariarnerujussuarmik kinguneqartussat, Hermann Berthelsen isumaqarpoq
Kangerlussuarmi iluameersumik umiarsualiviliortoqarli, umiarsuit takornariartaatit nunaqarfimmut talissinnaaleqqullugit.
Qeqqata Kommuniata borgmesteria Hermann Berthelsen Inatsisartut tallimanngornermi ukiakkut ataatsimiilernerannut atatillugu taama kaammattuuteqarpoq.
Umiatsiamik ikaassuisariaqartartut
Umiarsualivik nutaaq pingaarutilerujussuanngorsinnaavoq ilaasut kuffertitik nassarlugit umiarsuarnut, ilaasut nioorarniarlugit nutaanillu ilaasulersorniarlutik Kangerlussuarmik atuigajuttartunut, nunamullu umiatsianik ikaassorneqartariaqarmata. Tamatuma saniatigut taquassat umiarsuarnut ikaassorneqartariaqartarput.
Periarfissat nutaat
Kaammattuut kommunalbestyrelsi nunaqarfik pillugu kommunimi pilersaarummut tapiliussamik akuersissutiginneqqammersorlu takkuppoq.
Taama aalajangiisoqarneratigut ilaatigut takornarialerisoq sermersuup eqqaani illuaraqarfiliorsinnaanngussaaq, ilaatigullu kommunimi pilersaarummut tapiliussap Kangerlussuarmi tammajuitsussarsiniarluni aallaaniarnissamut akuersissutit pisinnaanngortissavaa, tamatumani ingerlatsisut arlallit piniariat illuaraannik pitsaalluinnartunik sanaartorusummata.
ATV-nut aqqut
Taamatuttaaq kommunalbestyrelsi Sisimiut Kangerlussuullu akornanni ATV-nut aqqusinermik sanaartornissamut aningaasanik immikkoortitsivoq.