Kommunimut qineqqusaarneq 2017

Borgmesteri: Aningaasaqarneq Nicolai Nissenip pikkoriffigisimanngilaa

Nicolai J. Nissen (S), kommunalbestyrelsemut qinigassanngortittup ullumi ulloqeqqata-tungaani borgmesteri Asii Chemnitz Narupimut apeqquteqarpoq. Kommuneqarfik Sermersuulli aningaasaqarneranut apeqqutigisimasai maanna akissuteqarfigineqarput.

Nicolai J. Nissenip ullumi ataasinngornermi apeqquteqaatai, Asii Chemnitz Narupip akissuteqarfingai.

Aningaasaqarneq iluamik aqunneqassasoq Nicolai J. Nissen isumaqarpoq, taamaammat paasisinnaanngilaa sooq Kommuneqarfik Sermersuup aningaasanut missingersuusiarisimasamini ingerlatsiveqarfinni assigiinngitsuni millionerpaaluit atunngitsoorsimanerai.

Atuaruk: Apeqqutit aningaasaqarnermut tunngasut

- Nicolaj Nissenip Kommuneqarfik Sermersuup decembari 2016-mi qaammatikkaartumik nalunaarusiaa misissorsimavaa. Apeqqutigisimasaali aallaavigalugit eqqarsartoqarsinnaavoq Nicolaj Nissenip aningaasaqarneq pikkoriffigivallaanngikkaa. Nicolajip ilisimagunanngilaa kommunip naatsorsuusiortarnera februarip 20-ani killigitinneqarmat. Akiligassarpassuimmi kingumoortumik akilerneqartarput. Qaammammut nalunaarusiaq piareerneqareersoq akiligassat aatsaat akilerneqartarput. Taamaammat decemberip qaammataani nalunaarusiaq missingersuummut sanilliunneqarsinnaanani, Asii Chemnitz Narup aallaqqaasiilluni erseqqissaavoq.

Nicolai J. Nissen, borgmesterimut ima apeqquteqarpoq:

Borgmesterip 2016-mi missingersuusiarineqarsimasumit 27 mio koruunit utoqqarnut innarluutilinnullu immikkoortinneqarsimasuni sooq atorneqanngillat?

Pitsaasumik innarluutilinnut aaqqissuussineq

Innarluutilinnut atuinikinnerulersimaneq borgmesterip nuannaarutigalugu akissuteqarpoq.

- Suliniutigisimasat taama inerneqarneri tulluusimaarutigeqaakka. Kommuneqarfik Sermersuup innuttaasunut Danmarkimi kommuneqarfinnilu allani najugaqarfinnut inissinneqarsimasut Nunatsinnut kommunitsinnullu angerlarsinnaanerat neqeroorutigisalernikuuvarput. Sipaaruteqarfiuvoq, uannut pingaaruteqarpallaanngilaq, pingaartipparali innuttaasugut nammineq inuunererusutaminnik periarfissinneqarsinnaaneri. Tamannalu inuunerissaarnermik kinguneqartarluni, Asii Chemnitz Narup erseqqissaavoq.

- Nicolai Nisseni eqqumiigisaata ilagaat kommunep qanoq isilluni 35 mio koruunit inissialiornermut atorsimanerai naak inissianik nutaaliortoqarsimanngikkaluartoq. Eqqortuungaluarpat akissuteqarfigissangaluarpara. Eqqortoq tassaavoq 2016-mi inissialiornermut 60 mio koruunit atorsimagatsigit, taamaasilluta 2016-mi kommuni nutaanik 35-nik inissiaatitaartissimallugu aammalu inissiat allat suli sanaartorneqartut aappaagu 2019-milu 126-it naammassineqassallutik.

Siumup qinigassanngortitaa siullermeerluni kommunalbestyrelsemut qinigassanngortittoq, borgmesterimut ima aamma aperivoq:

Paaserusunnarpoq borgmesteri sooq atuarfeqarfinnut- utoqqarnut- innarluutillinnullu kommunip immikkut iliuuserisariaqarfiini sipaarniartoqarsimanersoq illuatungaanilu 2016-mi kommuneqarfik qarasaasianut 15.000.000 koruuninik missingersuutaasimasumit atuivallaarsimanera illersorlugu.

Atuarfeqarfinni qarasaasialerinermut millionit atorneqartut

Borgmesteri ima akissuteqarpoq:

- Erseqqissaatigissavara aningaasat atuarfinni atorneqarsimammata. Missingersuusiarineqarsimasumulli atuivallaarsimaneq pissuteqarpoq atuarfinni qarasaasiatigut atortut pitsaanerpaajunnaarsimammata taarersertariaqalerlutillu, IA-p borgmesteriutitaa oqarpoq.

'Ajornannginnerusumik' paasisaqarusukkuni kommuneqarfimmi parteeqatini aamma aperisimasinnaangaluarpai, borgmesterip Nicolai J. Nissen isoralugu naggasiivoq.

- Apeqqutigisimasaami tamarmik Siumumit isummersorfigineqarlutillu akuersissutigineqarnikuusut, borgmesteri tikkuaavoq. Borgmesteri issiavimminiinginnassaguni qinigaaffiit pingasuni borgmesterinngussaaq.

Powered by Labrador CMS