Borgmesteri Ane Hansen: Avannaata Isaariaa sumiginnarneqarpoq
Aasiaat mittarfissuartaannginnerat Aasianni Inuit Ataqatigiit amerlanerussuteqarnerannik tunngaveqartoq, Kommune Qeqertalimmi borgmesteri, Ane Hansen isumaqarpoq
- Mittarfissualiornissanut tunngatillugu eqqartuisoqarnerani avaqqutaarneqartuaannarpugut, naak Aasianni sanaartortoqassappat tamanna akikinnerpaajusoq misissuinerit takutereernikuugaluaraat. Taamaattumik kukkusumik parteeqarnerput pissutaalluni Aasianni mittarfissuartaarsinnaangilagut.
Kommune Qeqertalimmi borgmesteri Ane Hansen aviisimut Sermitsiamut oqarpoq.
Naalakkersuisuusimasunit ilalerneqanngitsoq
Mittarfeqarfiit Aasianni mittarfiat 799-inik takissusilik, ukioq manna ukiunik 25-nngortorsiorluni nalliuttorsiorpoq. Mittarfik Islandimiut suliffeqarfiutaannit sananeqarpoq, nunattalu karsia 49 millioner koruuninik aningaasaliisinnaappat, mittarfiiortut sanaartornerminnut atatillugu mittarfiup 1200 miiterinut tallinissaa neqeroorutigisimagaluarpaat. Tamannali taamanikkut Naalakkersuisunit ilalerneqarsimanngilaq.
Aasiaat Kommunerisimasaani kommunalbestyrelsi, Islandimiullu suliffeqarfiutaat, mittarfiup tallineqarsinnaanissaanut misissuinermik sukumiisumik taamanikkut suliaqarput. Mittarfiullu 3000 miiterinut tallineqarsinnaanera periarfissaasoq, taannalu 600 millioner koruunit missaanik akeqassasoq, misissuinermi paasineqarpoq.
Ilulissaniunngitsoq Aasianniissimasussaagaluartoq
Mittarfissualiornermullu atatillugu nutaamik talittarfiliornissaq periarfissarissaartoq, misissiunermi paasineqartut ilagaat. Taamaattumik mittarfissuaq talittarfillu nutaaq, Ilulissani sananeqaratik, akerlianilli Aasianni sananeqarpata, sanaartorneq akikinnerujussuussasoq, taamanikkulli ilisimaneqareersimgaluartoq, Kommune Qeqertalimmi borgmesteri oqarpoq.
Allaaserineqartoq Sermitsiami tamakkiisumik atuaruk. Aviisi uani pisiarineqarsinnaavoq: