Børnestreger GIF-ip titartaanermik unammisitsinerani 4. B ajugaavoq
3. klassimiit 5. klassimut atuartut titartaanermik unammisinneqarput 10.000 koruuninik akissarsiassartalimmik. Atuarfik Hans Lyngemi 4. B-mi atuartut ajugaapput
Kalaallit Nunaanni Timersoqatigiit Kattuffiat 3. klassimiit 5. klassimut atuartunik peqqissuseq timersornerlu pillugit plakatimik kusanarnerpaamik titartaasitsilluni unammisitsinerani 10.000 koruunit akissarsiassaapput. Unammisitsineq ingerlanneqarpoq Timersoqatigiit Kattuffiata ukioq manna 2013-imi ukiunik 60-inngortorsiorneranut atatillugu, titartakkanillu nassiussinissamut killissaritinneqarsimavoq maajip 17-iat.
Klassit 20-t peqataapput, klassilu ajugaasoq klassinit allanit unammeqataasunit annertuumik kusanartumillu ersaattaanneqarpoq, taamatut GIF tusagassiorfunnut nalunaarutikkut allappoq.
- Klassi suliassamut suleqatigiilluartorujussuusimavoq tamannalu ataqatigiilluarnerussutigilersimavaat, Atuarfik Hans Lyngemi 4. B-mi - ajugaasumi - klasselæreri Anne Elmark oqarpoq.
- Nalunngilarput inuiaqatigiinni meerartatsinnut qanoq pingaaruteqartigisoq peqqinnerup, timersornerup minnerunngitsumillu ilinniagaqarnerup sammitinneqarnera, qulakkeerniassagatsigu meerartatta asasatta nunarsuarmi unammilligassanik naapitsinissaminnut piareersimanissaat. Nukappiaraq niviarsiararluunniit kammagilluakkani peqatigalugi timersortartoq peqqinnartunillu nerisartoq pitsaasunik siammartiterissaaq, Carsten Olsen, GIF-imeersoq, oqarpoq.
Noermu 2-ngorput Kulusuup Atuarfiani 5. klassimi atuartut, pikkoreqalutik pinngortitarput kusanartoq plakatiliarisimallugu.
Kalaallit Nunaanni Timersoqatigiit Kattuffiata Nunatsinni timersorneq siuarsarniarpaa meerartatsinnut inuusuttortatsinnullu iluaqutaasumik.
Plakatit tamarmik GIF-ip facebookimi quppernerani takuneqarsinnaapput.