BMX-imi VM
BMX-imi VM-imi finalertoqarnerani Tommy orluvoq
Kølnimi BMX-imi VM-eqarnerani Tommy Mølgaard Christensen normu 16-inngorpoq Inuk Siegstadilu normu 36-inngorluni
Tysklandimi Kølnimi ulluni makkunani BMX-imi VM-eqarnerani inuusuttut Sisimiuneersut marluk peqataapput. Tassaapput Inuk Siegstad aamma Tommy Mølgaard Christensen.
Sapaatiummat Tommy Mølgaard Christensen finalimi peqataavoq, tassanilu orlugami tukkaatini aserorpaa, peqataasunilli 61-init kusanartumik normu 16-inngorpoq, Malene Christensen, Tommyp arnaa, paasissutissiivoq.
– Angusani nammineq naammagisimaarpaa. Majorallattarfiit rampit Sisimiuni atortagaanit sungiusimasaanit anginerujussuupput. Sisimiuni annerpaamik 180 centimeterinik portussuseqarput, maani minnerpamik 2 meterinik portussuseqarlutik, Malene Christensen oqaluttuarpoq nangillunilu:
– Tamatuma saniatigut peqataanini tulluusimaarutigaa, tassa Kalaallit Nunaat aatsaat siullermeersumik peqataatitaqarmat.
Pissutaasoq alla tassaavoq kiannersua, 34 gradit angullugit kiattarsimagami.
Tommy Mølgaard Christensenip maanna ilinniagaqarluni Randersimut nuuttussanngorami suli annertunerusumik sungiusartalernissani qilanaaraa.
Sungiusaasua Thomas ´Tarzan´ Hansen Randersimi najugaqarpoq, taamaattumik Tommylu sungiusaqatigiittartorujussuussagunarput, Malene Christensen naliliivoq.
Tommy Mølgaard Christensen Elitesport Greenlandimit aamma Sisimiunim Arctic Star-imit tapiiffigineqarsimavoq.
– Qujamasuutigaa BMX-imi VM-eqarnissaani peqataanissanissaminut periarfissimmanni, Malene Christensen oqarpoq.
Inuk Siegstad peqataasunit 45-nit normu 36-inngorpoq finalimullu ingerlaqqinngitsoorluni.
The BMX Freestye World Championship ingerlanneqarpoq juulip 18-iannit 20-annut.
Ajoraluartumik Tommy Mølgaard Christensenip aamma Inuk Siegstadip unamminerni assiinik erseqqissunik peqanngilagut. Assit marluk ataani takukkit