Friday, July 14, 2017 - 12:45

Blog af Sorlannguaq Petersen

Partii avissaartuuttoq ataatsimeersualerpoq

 

Seneste af Sorlannguaq Petersen

Partiimut naalakkersuisuutitaqartumut Siumumut Kim Kielsenip siulittaasuunerata nalaata ilisarnaatigaa eqqisisimannginneq, partiip iluani avissaartuunneq aamma pissaaneqarniunneq sakkortooq. Naalakkersuisut siulittaasuata Kim Kielsenip aamma Inatsartut siulittaasuta Lars Emil Johansenip pissaaneqarnijunnerat ima sivisutigilersimavoq, aappaata aappi appilasuutillaraangagu qinersisartut akornanni kanngunartuliartut tupaallaatigineqartarunnaareerluni. Illuatugaatigullu danskit aviisiini qalipaatigissaartuni aliikkutassianut eqqaanarnerusutut isumaqarfigineqalersimasorinarluni. Tupinnarluinnaraluarpormi Kielsenip Johansenimut uparuvaarujussuarnera kingulleq, Kielsen issuarneqarmat oqarsimanerarlugu Lars Emilip (qimmitut) anuata pituuta qangarsuarli kipisimasariaqaraluarini, isornartorsiortarunnaarniassammani. Tassa Naalakkersuisut siulittaasuata Inatsisartut siulittaasuannut isumaa. Tusagassiutit qisuariaatituaaraat kalaallisut oqarluallaqqissutsip erserneratut taagamikku. Danmarkimi statsministeri folketingip siulittaasuat pillugu assiganik oqarsimasuuppat statministeri qangarsuarli soraarsitaareersimallaqqooqqaaq. Nunatsinnili naamik. Politikkeriminni nuimasut imminnut akerartuuttarnersuat qinersisartut sungiutigaaramikkit soqutaasutut isigijunnaareerpaat. Politikkerit nuimasut akornerminni pissusilersortarnerannik tamanna ersersitsinerujussuuvoq.

Naalakkersuisut Inatsisartullu akornanni pissaaneqarniunneq

Aammali Naalakkersuisut Inatsisartullu akornanni ersarissorsuarmik pissaaneqarniuttoqarpoq, tunngaviusumik inatsisiliornissamut ataatsimiititaliarsuup sulinissaa pillugu. Ataatsimiititaliassarsuup suleriusissaanik suliaqartussatut Inatisartut Naalakkersuisut pisinnaatippaat.Naalakkersuisulli sulinissamut tunngavilersuut saqqummiummassuk piumasaralugu siunnersuutissat marloqiusatut suliarineqassasut, ataatsimiititaliarsuami ilaasortat akuerijumanngilaat. Naalagaaffinngornissamut naalakkersuisoq Suka K Frederiksen (Siumut) arlaleriarluni piumasaqartaraluartoq siunnersuutissaq marloqiusaassasoq, ataatsimiititaliarsuulli siulittaasuata Vivian Motzfeldtip (Siumut) tamanna tusaajumanngilaa. Kiisa Kielsen nakkaannartariaqalerpoq ministerini illersornagu, oqarlunili ataatsimiititaliarsuup nammineq aalajangerumaaraa qanoq suleriuseqassanerluni.

Pissaaneqarniunneq partiip iluani

Siusinnerusukkut nunanut allanut ministeriusimasoq Vittus Qujaukitsoq partiip iluani aqerlut Kielsenimik uppisitsiniartussat piareersarlugit aallarteruttorpai, Qujaukitsullu Kielsen siulittaasuunerlunnerarlugu naalagaaffinngorniarnermillu arriippallaamik sulinerarlugu ersornartorsiuisarnermini paassaatini sipaanngilluinnartarpai. Kielsenimut Qujaukitsup uumisaarutaa kingulleq tassa Aleqa Hammond Siumumut utertinneqaqqugamiuk, imminut illersuisut amerlisinniarlugit. Kielsenimuna Hammond Siumumit anisikkaa aningaasanik atugassarinngisaminik atuisarsimanera peqqutigalugu.

Partiip immikkoortoqarfiini eqqissiviilliornerit

Siumut immikkoortortaqarfiini Sisimiuni immikkoortoqarfik Kielsenimik Qujaukitsutut isornartorsiuilluni nipituuliornerpaavoq, Sisimiuni siulittaasunngoraluartoq, maannali soraarsitaalerami tunuartoq Kaaleraq Møller Andersen, taannaavoq angut inuusuttunnguaq nunatta namminiilivinnissaanik filmiliortoq Lars Emil ”inuttani pinaarnerutillugu”. Qularnanngitsumik filmimik taassuminnga sunnigaalluni Hr. Møller Andersen Lars Emiililerisuuvoq.

Hr. Møller Andersen sivikitsumik siulittaasuutsiarnermini oqarpoq Kielsen Qujaukitsorluunniit partiip siulittaasusaatut piukkutinngikkini, allamilli toqqaarusulluni. Kisianni Hr. Møller Andersen tunuarpoq immikkut ittumik ataatsimeersuarnissaq sioqqutitsiarlugu, qaammaterpassuunngitsut matuma siorna imminik qinersisut uppitsitinnginneranni, taakkumi Møller isornartorsiorpaat imminuinnaq eqqarsaatigaluni siulittaasunngoraluarsimanerarlugu. Hr. Møller Andersenilli tunuarnerminut peqqutiginerarpai, Naalakkersuisunut ilaasortanngorlaap Sisimiunilu siulittaasuusimasut Erik Jensenip immikkoortoqarfimmi aningaasatigut ingerlanerliortitsisimaneranut ’utoqqarsuillu partiiannut’ ilaasortaajumajunnaarusunnini.

Qaasuitsoq Kujallermi immikkoorniaqatigiit

Kommunimut qinersisoqareersimatsiartoq Qaasuitsoq Kujallermi Siumumi avissaartuuttoqalerpoq isumaqatigiikkunnaartoqarluni. Naak siulittaasoq Kielsen erseqqissuliorluni oqaraluartoq Siumuussagaanni 100 %-imik siumuusoqartariaqartoq, Siumup gruppianit anisut gruppiminni namminersorlutik ingerlaniarlutik nalunaarput, siulittaasumik oqaaqqissaarutai malikkusunnagit.

Kielsen siuttuuva sanngiitsoq?

Kingumut qiviarluni takuneqarsinnaavoq Kielsenip partiimut ilaasortani eqqissisimatissinnaasimanngikkai, oqaaqqissaarinerilu malerusunneqarneq ajortut. Soorluluunniit Kielsenip nalaani Siumumut ilaasortat namminneq piumasaannarminnik iliorsinnaatitaalersimasut, ilaasortat ataasiakkaat politikkikkut soqutigisatit kisiisa aallutilerlugit, partii ataatsimoortumik qimoqatigiikkunnaarsillugu. Kielsenittaaq politikkikkut aninguniakkani suunersut nunatsinni erseqqissumik oqaatigisarsimanngilai, tusarfiginerusarsimavarpullu Danmarkimut ataatsimiigiarsimalluni aviisiliortunit apersorneqarsimagaangat. Kielsen nunatsinni innuttaasunik ataatsimiisitsikulaartartoq tusartarparput, suulli oqallisigineqarsimanersut tusarneq ajorlutigit. Kielsen qanorluunniit inutsialassuutigigaluaruni – sulisartut qarliinik qarleqakulalluni tujuuloqartarlunilu – inuinnarpalaarluni - taava siulittaasuuffimmini qattunikkut qummuinnaq ilungersoqaluni majuarniarsarijuartutullusooq issimavoq. Angutitut aaliajagiisinnaassuseqarluartutut siulittaasup pisinnaasariaqagaanik amigaateqarsimanerpa?

Siumup iluani avissaartuunneq Kielsenip unitsissinnaanngippagu, paaseqatiginnerlu pisariaqartoq pilersillugu, taava Siumut partii marlunnunngorluni averiaannaavoq – illuata tungaani Qujaukitsoq-Johansenilerisut, illuatalu tungaani Kielsenilerisut. Tamannali aatsaat paasinarsiumaarpoq Siumut ataatsimeersuareerpat.

*** ***

PS:

”Isuma” una sapaatip akunnerani 27-imi Sermitsiami allappara.Sapaatip akunnerani 28-imi pissaanilissuup partii Siumup politikkikkut siulittaasuata tulliata, Hr. Wæver Johansenip akissuteqarfigaanga. Assut tulluusimaarpunga – tanngassimaarnaqaarmi politikkikkut nuimasorsuit ilaata Hr. Wæver Johansenip piffissaqarfigalunga ”naqqissormanga”, Naalakkersuisullu Kielsen siuttoralugu politikkikkut angusarisimasaat saqqummiussorlugit.. Arlaatigut  Hr.Wæver Johansenip nuannarinngilluinnagaatigut eqqorsimagunarpara, taama sakkortutigisumik qisuariartariaqalersimammat. Hr. Wæver Johansenilli pissutsit assigiinngitsut akuliussuuppai. Naalakkersuisooqatigiit, partiinit pingasunit peqataaffigineqartut, angusaat immikkoortillugit nalilersugassaapput, taamatullu partiip Siumut ilumini avissaartuunnera aamma immikkoortillugu nalilersugassaalluni. Wæver Johansenillu allagaa atuaqqissaaraanni partiimi pissaanilissuarni Siumumi avissaartuuttoqarneranik isumaqarnera akerlilinngilaa. Siumumimi avissaartuuttoqarnera partiip siulittaasuata Kim Kielsenip Sermitsiami nr. 28-mi nammineerluni ilumoornerarpaa oqarami:” Siumumi pissaaneqarniunneq pineqarpoq – allamik naamik”. 

Kommentarer