Skip to main content
Greenlandic

Nunatsinni ajortimik kingornussisarnermik eqqarsartaaneq ullumikkut sumut killippa? Imaappa angut inuusuttuunermini toqutsisimappat, taava ajortaa parnaarussaajunnaareerluni inuiaqatigiinniilerpat kinguaavisa kingornutassarissagaat? Tamakku eqqarsaatit tikinngitsuunngilakka sap.ak. 19 ukioq 2013 AG saqqummerluni saqqalerniarneqarnerani kukkusumik assitaliisoqareersorlu. Kalaallit imaanniarnerpugut uffa tamatta immitsinnut ilisimaarisuulluta tusagassiutigut atussallugit, inuit aalajangersimasumik pinerluuteqarsimasut nittarsaattassallugit, taamalu ilaqutai kukkussuteqanngitsut kanngusuutississallugit ilanngullugit?

Tamannali imaaliallaannaq qaapiartumik piumanagu misissulaarpakka Etikki teologiilu pillugit oqallittarnerni sammisani qitiusunut ilaalluinnarsimammat, inuk ajortilinngoreernermi kingorna suli namminiussuseqarluni kiffaanngissuseqarnersoq: Inuup ajunngitsoq qinersinnaanerpaa, taamaaliornermigullu ajunngitsunngorlunilu upperluinnartunngussalluni. Imaluunniit ajorti ima ajortigaa taamaallat Guutip kisimi tamanna qanoriliuuseqarfigisinnaassallugu. Taamaallaat saammaassinermigut inuk naapigiaqqissinnaassallugu?
 
Ajortimik kingornussisarnermik (arvesynden) eqqarsartaaseq Paulusip allaasereqqaarpaa, tamannalu tunngavigalugu Augustinip (430) allaaseraa kinaluunniit inuk naliginnaasumik inunngortoq ajortiliusoq. Augustinillu Paulusimiik sakkortunerujussuarmik naqissuserpaa, naak Jiisusi annaassiartorluni tikiukkaluarmalluunniit, inuk ajortiliussutsiminiiginnartoq. Kinaluunniimmi kinguaassiutit atornerisigut suliarineqarluni inunngortoq ajortimik ”kingornussisuuvoq”, tamannalu Adamip Evamillu pilerpoq.
 
Imaappoq ajorti tassaannaanngilaq inuup namminissarsiorneranut attuumassuteqartoq, kisianni aamma timiussutsimi, kinguaassiutinillu atuisarneraniilluni. Taamaallaallu Guutip akulerunneratigut ilagiinnilu ilaasortaanikkut tassanngaanniik illuartinneqarneq pisinnaavoq. Taamaakkaluartorli suli inoqarpoq tassannga kaanngartitaasinnaanngitsunik, taakkualu tassaapput Guutip inunngunngikkallarneranniilli aaliangereersimasai tassaniiginnartussaasut.
 
Naallu Augustinip nalaani inuusut ilaanniit isumaqartoqartaraluartoq, inuk kiffaanngissuseqartuulluni inuusartoq, ajunngitsuliornermigullu pitsaanerusumik inissinnissaminut periarfissaqartoq, eqqarsartaaseq Augustinimit pilerfeqartoq ukiuni akullerni (middelalder) ilagiit akornanni ersarinnerpaalluni inissisimasimavoq.
 
Naak kristumiut teologiisa tunngaviatigut, Jiisusip anniartitaalluni sanningasulimmi toqunermigut, toqusunillu makinnermigut inuit ajortaannik imminiisitsilernermigut, inummik ajortimiik (nappaatit, toqu, anniaatit ajunaarnerniillu) annaassinera aalingiusimaneqaraluarluni. Aamma naak Augustinip ajortimik kingornussinermik eqqarsartarnera isumaqatiginngikkaluaraanniluunniit suli ajorti nunarsuarmiippoq. Aatsaallu silarsuup naggatissaanni, Jiisusi tikiuteqqikkuni silarsuaq inuillu ajortimiit salissagai oqaatigineqartarpoq.
 
Kisianniuna tusagassiutinik atuinitsinni inoqatitsinnik tikkuartuilluta kikkut ajortilissuuneranik tikkuartuussinitsigut nunatsinni inuuneq pitsaanerulersissinnaagipput? Imaluunniit tassani marreqqanermi ajortip suussusaanik paasinninnissamut periarfissaqarsimannginnatta tamaanga killissimanerpugut? Oqallisigissagutsigu aallartiffeqartariaqarpoq, aamma ajortip isumakkeerneqarneranik iliuutsigut oqaluffiup iluani suliassatut takorluugaasaraluit inuiaqatigiit akornanni ammanerusumik eqqartorsinnaasariaqarsoraakka, taamaaliornitsigut akunnitsinni ajunngitsumik inuuneqalernissamik immaqa aqqutissiuusseqataasinnaassagunaratta.