Wednesday, March 15, 2017 - 14:56

Blog af Juaaka Lyberth

Demokratiskiusumik oqallinnermut KNR amigartoortitsivoq

 

Fulde navn: Juaaka Lyberth
Alder: 61
Nuværende bosted: Nuuk
Opvokset i: Uummannaq
Primær beskæftigelse: Musiker, forfatter, freelance mediearbejder og konsulent.
Fritidsinteresser: Madlavning, sejllads, fiskeri, jagt, spille musik, lytter til radio og ser tv, følger med samfundsdebatten. Foreningsarbejde.
Det handler min blog om: Jeg vil fokusere på den grønlandske kunst- og kulturliv, herunder anmeldelser af kunstneriske udgivelser, musik og grønlandske madvarer. Endelig vil jeg skrive ad og til om medier og politik.     

Ateq: Juaaka Lyberth
Ukiut: 61
Najugaq: Nuuk
Alliartorfik: Uummannaq
Suliaq pingaarneq: Nipilersortartoq, atuakkiortoq, freelanceritut tusagassiortartoq aamma siunnersorti.
Sulinngiffimmi sammisat: Angalaarneq, aalisarneq, pinialunneq, nipilersorneq, radiumik tusarnaarneq, tv-mik isiginnaarneq, inuiaqatigiinni oqallinnermik malinnaaneq. Peqatigiiffilinerineq.
Blogginni uku sammivakka: Nunatsinni eqqumiitsuliornermut kulturimullu tunngasut samminiarpakka, matumanissaaq eqqumiitsuliornikkut saqqummiussat, nipilersukkat aamma kalaallit nerisassiaat nalilersortassallugit.Kiisalu tusagassiutit politikkilu pillugit ilaanneeriarlunga allagaqartassaanga.

Sivisuumik eqqarsaatigisimavara, oqalliseqataaninnili imminut killilersorama suli allaaserisimanagu – aatsaat maanna. Aap samminiarpara tamatta KNR Radiorput – amerlasuut asasaat narrugissallugu, isornartorsiutaannagajannillu isummersorfigisartagaat.

Radiup allakaatitseriaasii nutaat: Facebookitsigut allagitsi – uagut atuarumaarpavut nipilersorlutalu
KNR pingaarnertut takisuunik pingasunik aallakaatitsiffeqarpoq, ullaakkut, ullaap tungaa ualikkullu, toqqaannartumik ingerlanneqartartunik. Periutsit assigiipput. Aallakaatitassiortut 2-3, aallaqqaammut imminnut sammillutik oqaluuterujoortartut, sila anori, allallu qilaap nunallu akornanniittut suugaluarnersut eqqartorlugit, sorpassuit soqutaanngitsullu, taava naalaartut qinnuigineqartarput Facebookikkut allagaqaqqullugit, sammisassamut ( soqutaalluanngitsumut) qulequtsiusimasamut, kingornatigullu aallakaatitsisut Facebookimi allassimasut atuartaqqaartarpaat – taamaasillunilu nigalik imminut kaajallattarpoq, aallakaatitsisorlu naggasiigajuttarpoq oqarluni: ”qujanaq peqataalaarsinnaagavit”. Aallakaatittakkat tamakku imarikkajuppaat inuit ataasiakkaat naleqartitaat oqitsumik maavaartutut taaneqarsinnaasut, inuunerup qanoq ingerlanneqarsinnaaneranik ilitsersuerujoornerit, qanoq iliuussisatut oqaaqqissaarutit, inuillu ajunngitsuinnarnik iseqarlutik isummersuutaat. Minutserpassuit atorneqakkajupput inuit allat nersualaarlugit, erinarsuutip taallaanik eqqoriaasaqattaarluni, imaluunniit allanik aallakaatitassiortut nuannersorisaat sammillugit. Iluatsitsisut tiitorfissuarmik, T-shirtimillu eqquisinnaapput, TV-milu programmini Ipad, mobiltelefon aningaasarpassuillu akissarsiarineqarsinnaallutik. Kina oqanngila aningaasanoorusussuseq nunaqarfiinarni illoqarfiinnarnilu atorneqartoq?

Radiotoqaq maqaasinarpoq
Radiomut nutaamut unissanani ingerlajuarmut, minutsit sisamakkaarlugit oqaloqateqarnermik nipilersornermillu paarlakaatitsiuartumut, uanga utoqqaavallaalersimagunarpunga. Aallakaatitseqqittoraangallu tusaaneqarsinnaasanngilakka “flademit” sorlermit aallakaateqqiisoqarnersoq. Radiotoqaq maqaasivara, suna samminerlugu aallakaatitsisup nalunngilluaraa tusaaneqarsinnaaffiusoq, ilisimasani qaffasimmata aamma aallakaatitassani sioqqullugu paasiniaalluarsimanera tusaaneqarsinnaasarmat. Ullumikkut imaappasinnerusarami aallakaatitassaq aallartereeraangat aatsaat paasiniaasoqalersartoq. Ajuusaarnaqaaq utoqqatseraluarpungalu.

Innuttaasunut demokratiimik amigartitsisoqarpoq
Kommunalbestyrelsinut qinersinissamut sapaatit akunnerisa pingasuinnanngulerneranni tupigusuutigisarpara, aallakaatitsiffiusartut ilaanni minutsit arlaqanngitsuinnaalluunniit kommunimut qinersinissamut politikkimillu oqallinnermut KNR-ip atortanngimmagit. Soorluliuna KNR-ip qunugilersimagaa politikkimik innuttaasunik oqaaluuserisaqartitsinissani, inuiaqatigiillu (kommunal-) politikkikkut sumut qanorlu ineriartortinneqarnissaat innuttaasunut oqallisigitissallugu qunugigaa. Aap – nutaarsiassaqartitsiffeqaraluarpoq, taakkuli naalakkersuisoqarfinniit soqutigisaqaqatigiinnillu tusagassiutinut nalunaarutinik – sakkortulaartumik oqaatigalugu -  atuartarfiinnaanerupput – utoqqatseqqippungalu. Maqaasisakka tassa inuiaqatigiit qanoq ineriartortinneqarnissaannik aaqqissuunneqarnissaannillu oqalliseriaatsit sukumiisut innuttaasunut tamanut sammisut, siunissamilu unammilligasatta qanoq aaqqiiffigineqarsinnaanerinik isummersorfiusut. Aallakaatitseriaatsit takisoorsuit, ulloq unnuarlu ingerlasartut, qarsupiinnangajattunik imaqartartut, ilaat minutsialuinnannguilluunniit inuiaqatigiinni politikkikkut ineriartornermut sammisunut atorneqarsinnaannginnerlutik?

Aallakaatitakkat ilaannit minutserpaaluinnannguilluunniit politikkimut
Ilaanni eqqarsartarpunga – nunarput taama isorartutigisillugu angalanerlu akissutigisillugu –ullaakkut minutsit 15-niinanngulluunniit, inuttaasut kommuninullu qineqqusaartut nunatta siunissaa pillugu oqaliffigisinnaasaannik KNR-ip atortarsinnaannginnerai. Assersuutitut ullaakkut aallakaatinneqartartumi minutserpassuit atorneqartarput aaallakaatitsisut soqutaarpianngitsunik oqaloqatigiinnerinut, imminnut misiliisaqattaarnerinut soorlu ulluni arlalinni kaffisorsimannginneq aallakaatitassiortumut qanoq sunniuteqarnersoq, imaluunniit isikkanik imermut nilalimmut misuttaarnermut, erinarsuutit taallaannik eqqoriaasaqattaarnermut, inunnik allanik nersualaarinernut, taallanik ilisimaneqanngitsunik atuaqattaarnernut allarpassuarnullu. Kisianni politikki KNR-ip aallakaatitaani oqallisigissallugu inerteqqutaagunarpoq. Tusaraluarpara qineqqusaartitsilluni aallakaatitsinissanik pilersaaruteqartoqartoq. Aallakaatitassialli tamarmiusut sivisussusaannut naleqqiullugit, qineqqusaartitsinissat ataatsimut katinneri naammaqqajarpasinngillat. Taamaattumik isumaqarpunga innutaasut nunamik ineriartortinneqarnissaannut oqalliseqataanissaannut KNR-ip periarfissiissutai killeqarpallaarujussuartut – demokratiimik oqalliseqataanissamut amigartoortitsillutik – politikkikkut oqalliseqataanissamut periarfissat ataatsimut isigalugu annikippallaaqimmata.

Juaaka Lyberth
Isummersortartoq

Kommentarer