sammisaq
Bjørn Bay: Inuusuttut samminiarpavut
Kalaallit Nunaanni Politiit ukiumoortumik nalunaarusiaasa takutippaat nalunaarutigineqartartut tallimararterutaanni inuusuttunik akuusoqartartoq
Pinerlunnerit inuusuttunit ingerlanneqartartut amerlanerpaartaat pisuunngorniarluni pinerlunnerusarput, tassa assersuutigalugu illumut iserluni tillinniarnerit, tillinniarnerinnaat aamma pisiniarfinni tillinniarnerit.
Tamanna politiit ukiumoortumik nalunaarusiaanni takuneqarsinnaavoq.
– Eqqarsarnarpoq inuusuttut pinerluutiginerpaasartagaat tassaammata tillinniarnerit, pinerlunnerillu tamakku erloqinartuupput toqqissisimananngeqalutillu, Bjørn Bay oqarpoq.
– Pitsaasortaraali pinerluttulerinermik inatsimmik 2013-imi unioqqutitsinerit 4713-iusimammata, tassa 2012-imut sanilliullugu 5335-iniit ikileriarsimallutik. Politiit suli isumaqarput pinerlunnerit inunnik ulorianartorsiortitsisut ajornartorsiutaasut annertuut. Tamakkua pinerluttulerinermik inatsimmik unioqqutitsinerit 27 procenteraat, tassa nakuusernerit aamma kinguaassiuutitigut pinerlunnerit - nakuusernerit 731-iullutik kinguaassiuutitigullu pinerlunnerit 312-iullutik, Bjørn Bay oqarpoq.
Piviusut imaapput, unioqqutitsinernit nalunaarutigineqartunit 4713-init pisuni 849-ni inuusuttut 18 tikillugit ukiullit unnerluutigineqarlutilluunniit pasillerneqarsimapput. Tupinnanngitsumik 15-18-inut ukiullit inuusuttut pinerluutaat amerlanerpaat ingerlattarpaat. Tassa 18 procentini, imaluunniit pinerlunnerit tallimaagaangata ataatsip missaani inuusuttoq peqataasarluni.
– Tamatumunnga atataillugu soorunami isiginiarneqassaaq politiit taamaallaat akulerutsinneqartarmata inuusuttut 15 inorlugit ukiullit sakkortoorujussuarmik pinerlussimagaangata. Tamatumunnga pissutaavoq inuusuttut 15 inorlugit ukiullit inatsisinik unioqqutitsisut politiit, eqqartuussiviit imaluunniit pinerluuteqarsimasunik isumaginniffiup pillarneqarsinnaanngimmata, isumaginninnikkulli oqartussaasunit isumagineqassallutik, Bjørn Bay oqarpoq.
Qujanartumik inuusuttut pinerluttartut 2012-imi amerlasoorujussuusimariarlutik 2013-imi malunnartumik ikileriarsimapput - ukiuni tallimani aatsaat taama ikitsigalutik.
– Sulili amerlaqaat, oqartussaasulli attuumassuteqartut, ingerlatsiviit attuumassuteqartut inuiaqatigiillu avatangiisaaniittut ataatsimut iliuuseqarnerisigut, inuusuttut pinerluttartut ikiliartornerat attatiinnarneqarsinnaavoq, Bjørn Bay oqarpoq.