Bjarne Hansen U-OL-imi angusarissaartoq

Bjarne Hansen sapaatip-akunnerata naanerani European Youth Olympic Festivalimut peqataavoq, taanna aamma inuusuttut OL-iannik taaneqartarpoq.

Arpannermi siullermi 70,5 kilometerimut klassiskernermi, arpannermik naammassinnittunit 51-iusunit 44-uulluni apuuppoq, 10 kilometerimullu sukuutsernermi 54-iusunit 38-iulluni apuuppoq. Sprinternermilu peqataasunit 58-isunit 32-iulluni apuuppoq.

Atuaruk: Inuusuttut OL-erneranni kalaallimik peqataasoqassaaq

Ujakkaartartoq nersualaarneqartoq
Bjarne Hansen inuusuttut OL-ernerannut peqataanera, ujakkaarluni nunanut allanut unammisartut sungiusaasuata Øystein Slettemarkip nuannaarutigaa.

- Inuusuttorpassuit pitsanngorniarlutik ullut tamaasa sungiusartartut amerlasoorujussuupput. Taakkunanngalu pitsaanerulissagutta minnerpaamik taama sungiusartariaqarpugut. Tamannalu Bjarne Hansenip paasisimavaa, tamannalu aamma angunissaanut iliuuseqarusuppoq. Taamatut anguniagalimmik inuusuttumik timersortartoqaratta pitsaaqaaq, Øystein Slettemarkimi unammisartoq inuusuttoq nersualaarpaa.

AWG-mit annertuneq
Unamminermut peqataanini misigisaqarfiulluartoq Bjarne Hansenip oqaluttuaraa.

- Timersoriaatsit allat takullugit misigisaqarfiuvoq, timersortartullu peqatikka timersuutiminnut pikkorissorpassuuppoq. Ammaanersiorneq kusanarlunilu Arctic Winter Gamesimi misigisannit annertunerujussuuvoq, tusagassiuutinut nalunaarummi oqarpoq.

Tyrkiami illoqarfimmi Erzurumimi immap qaanit 1.700 meterinik portussusilimmi arpannerit ingerlanneqarput.