Biskoppi: Palasissaaleqineq annertunerulersinnaavoq
Teologiimi ilinnialertussatut tigusaasut marluinnaapput ukioq manna
Nunatsinni palasitut atorfiit pingasut inuttaqanngillat, tamannali ajornerulersinnaavoq suli. Tassami teologiimut atuarfimmut ilinniartut marluinnaat atualernissamut akueritissimapput.
- Palasissaaleqivugut. Innuttaasut ajornartorsiutaat assigivagut, tassami ilinniarsimasunik Nunatsinni amigaateqartoqarpoq, biskoppi Sofie Petersen Sermitsiaq.AG-mut oqarpoq.
Ukiuni kingullerni arfineq pingasuni teologitut ilinnialertussat aatsaat taama ikitsigipput. Ukiuni kingullerni sisamani ilinnialertut arfiniliusarput, 2012-mi 2011-milu pingasuullutik.
Palasitut ilinnialertut amerlerianngippata siunissami ajornartorsiut annertunerulersinnaasoq biskop Sofie Petersen isumaqarpoq.
Ukiuni qulini palaseqanngitsoq
- Marlummi ikippallaarput. Aamma ilinniarnertik naammassippassuk palasitut atorfeqarusulissanersut ilisimanngilarput, oqarpoq.
Ittoqqortoormiini ukiuni kingullerni palaseqanngilaq, Upernavimmi ukioq ataaseq palaseqarsimanngitsut.
- Nunaqarfinni palasissaaleqisoqarpoq, taamaammat palasissaaleqisoqarnera malunnarluarpoq, biskop Sofie Petersen oqarpoq.
Illoqarfiit soqutigineqarnerusarput
Palasit illoqarfinni sulinissartik kajumerinerusaraat oqaatigaa.
- Illoqarfinni anginerusuniikkusunnerusarput.
Sisimiuni ataatsimik palaseqarpoq, palasimik ataatsimik amigaateqarluni.
- Atorfiit inuttalerneqarnissaat soorunami neriuutigaarput. Perorsaasut akornanni aamma assinganik ajornartorsiuteqarput, tassami perorsaasut amigaatigineqarmata, biskop Sofie Petersen oqarpoq.