ilisimatusarnermut sinaakkutit
Biotek pillugu siunnersuummik isornartorsiuineq
Naalakkersuisut siunnersuutaat ilisimatusartunut tunuartilersitisinnaasoq, Ph.d.-mik DTU-mi ilinniartup aarlerisaarutigaa
Inatsisartut upernaakkut ataatsimiinnissaminni inatsimmik allannguutissamik akuersinerminni, Nunatsinni bioteknologimut aningaasaliinissaq pilerinarunnaartilluinnarsinnaaneranik kinguneqartissinnaavaat.
Saniatigullu inatsisip ilisimatusartut nalinginnaasut Nunatsinni mikrobiologimik ilisimatusarumajunnaartivissinnaavai, taanna nunat tamalaat silap pissusaanik ilisimatusarnermi qitiuvoq.
DTU-mi ph.d.-mik ilinniartumit, Aviaja Hauptmann Lyberthimit aarlerisaarut taama nipeqarpoq.
Matusisinnaasoq
Taassuma blogimini tikkuartorpaa, inatsisissatut siunnersuut apriilip 15-iani siullermeerneqartussaq siuarsaanissamik siunertaqaraluartoq, ilisimatusarnermut ineriartorsinnaasumut matusisinnaasoq.
Namminersorlutik Oqartussat inatsimmik taassuminnga nutaamik eqqussinikkut annerpaamik allannguutissatut kissaatigaat, ilisimatusartut maanna ataatsimut isumalluummik iliaimatusarnissaminnut, saniatigullu niuerutigisinnaanissaanik qinnuteqartalissasut, Aviaja Hauptmann Lyberth erseqqissaavoq.
Maannamut ilisimatusartut niuerutiginninnissamut soqutiginninngitsut ilisimatusarnissamut akuersissutaannarmik qinnuteqarsinnaapput. Ilisimatusartut aamma suliffeqarfiit nierutiginninnissamik soqutiginnittut immikkut taakkut qinnutigisarpaat.
Ataasiarluni qinnuteqartoqartassasoq
Inatsisissamut oqaaseqaammi ersarilluinnartumik oqaatigineqarpoq, ataasiaannarluni qinnuteqaateqarnissaq illuatungeriinnut iluaqutaalluinnartussaq.
Kisianni inatsisip ilisimatusartunut nalinginnaasunut kinguneritissavaa, suliassamik isumaginninneq annertoorujussuaq aqqusaaqqaartalernera, saniatigullu sullissinermut akiliisarlutik.
Maannamut ilisimatusarnermut naalakkersuisoqarfimmut mailimik nassiussiinnartoqarsinnaagaluarpoq, ilisimatusarnissamullu akuersissummik pissarsilluni. Maannali qinnuteqaat ilungersunartumut pisalissaaq, ph.d.-mik ilinniartoq taama aarlerisaaarivoq.