Biologit ukiuunerani tuttunniartoqarnissaa innersuussutiginngilaat

Pinngortitaleriffimmi biologit 2015-imi ukiuunerani tuttunniartoqarnissaa innersuussutiginngilaat.

Tamanna Aalisarnermut, Piniarnermut Nunalerinermullu Naalakkersuisoqarfiup tusarniaaneranut akissutaanni erserpoq.

- Pinngortitaleriffiup Nuussuarmi, Naternami, Kangerlussuaq‐Sisimiuni, Akia‐Maniitsumi, Ameralimmi, Qeqertarsuatsiaani, Qassini, Neriami aamma Ivittuut/ Piniarfik immikkoortoq 11‐mi ukiuunerani tuttunniartarnerup ammaqqinneqarnissaa innersuussutiginartinngilaa, Pinngortitaleriffik Namminersorlutik Oqartussat tusarniutaannut akissuteqaammini taama allappoq.

Tusarniaanermi uani pineqarpoq Inuarfissuaq (Inglefield Land) / Prudhoe Land aamma Kangerluarsuup (Olrik Fjord) avataasigut sumiiffinni allani aamma ukiuunerani tuttunniarnissamut akiliillunilu tuttunniarnissamut ammaasseqqittoqarsinnaanera.

Ukiuunerani piniarneq akornusiisinnaavoq
Pinngortitaleriffiup akissuteqaataa naapertorlugu tuttut inuussutissaqassutsiminnut naleqquttumik amerlassuseqalersimagunarput, piaqqiornerat aalaakkaalluni, allaat tuttoqarfiit amerlanersaanni amerliartulaarlutik.

- Taamaattumik tuttut ikilisaavigineqaqqinnissaat kissaatigineqanngilaq, Pinngortitaleriffik tusarniummut akissuteqaammini ilaatigut taama allappoq.

Pinngortitaleriffimmiut nangillutik allapput tuttut massakkut amerlassutsimittut amerlassuseqartuarnissaat amerliartornissaallu Kalaallit Nunaanni tuttoqarfiit amerlanersaanni ukiakkut killilersuinertaqanngitsumik tuttunniartoqartarnissaanik kissaateqarnermut naapertuuttoq.

- Ukiuunerani tuttunniartarneq akornusersuinermik nassataqartartoq, piaqqat amerliartornissaannut akornusiisarpoq, ukiarneranilu killilersuinertaqanngitsumik tuttunniartarnermut ajoqutaalersinnaalluni, Pinngortitaleriffimmiut ukiuunerani tuttunniartoqannginnissaanut innersuussumminni ilaatigut taama tunngavilersuipput.