Biologit raajarniarnermi isumallualersitsipput

2016-imi raajartassat 90.000 tonsit.

Biologit 2016-imi Kitaani raajartassiinissamik taamatut inassuteqarput, oqarlutik raajat ikiliartorunnaarlutik amerliartoqqilersimasut.

Taamaasilluni Kitaani raajartassat 2015-imut sanilliullugit 30.000 tonsinik amerlanerupput, ukioq manna 60.000 tonsinik pisaqartoqarnissaa inassutigineqarsimammat.

Amerliartortut

Pinngortitaleriffiup 2015-imi misissuinerata takutissimavaa aalisarnermi raajaararpassuit takkukkiartortut, naatsorsuutigisariaqartorlu raajat ukiuni aggersuni amerliartussasut.

– Taamaasilluni ukiuni kingullerni raajat Kitaani ikiliartornerat mumissimasinnaavoq, Pinngortitaleriffik oqarpoq.

Pinngortitaleriffiup ilaatigut aallaavigisimavaa raajaaqqat (rekruttinik taaneqartartut) aalisarneqalersussat ukiuni kingullerni qulini amerlanerpaaffimmissut amerlatigingajattut. Raajallu mikinerit (ukiunik marlunnik pisoqaassusillit) amerlassusaat ukiuni kingullerni 20-ni agguaqatigiissillugu amerlassusaannit amerlanerusut.

Pisassat ikiliartortut

– Ilaatigut naatsorsuutigineqarpoq pisassiissutit ikiliartortinneqarnerat pissutigalugu 2008-mit pisat ikiliartornerat pissutaalluni aalisarneq annikillisikkaat taamalu raajanik ikilisavallaartoqarsimanani, Pinngortitaleriffik tusagassiorfinnut nalunaarutikkut allappoq.

Tunumi 2016-imit raajartassatut siunnersuutigineqarput 2.000 tonsit, tassa 2015-imut sanilliullugu allanngoratik.