pisassiissutit
Biologit: Avaleraasartoortassat ammassassuillu annertuumik apparneqassapput
Biologit Atlantikup avannaata kangiani avaleraasartoortassiissutigineqarsinnaasut, ammassassuartassiissutigineqarsinnaasut saarullernartassiissutigineqarsinnaasullu pillugit 2018-imut siunnersuinerat aalisartunut nunap karsianulluunniit atuagassaq soqutiginartuunngilaq.
Biologit siunnersuisartut kattuffiata, ICES-ip, avaleraasartoortassiissutit 2017-imi pisassiissutinut sanilliullugu 36 procentinik appariartinneqarnissaat innersuussutigaa, taakkulu 2018-imi 550.948 tonsit sippoqqunngilaat.
Nunat assigiinngitsut 20-nit amerlanerusut avaleraasartoorniaqataasarput, 2017-imilu pisat tamakkerlutik 1.178.850 tonsiusimapput. Nunatsinniit aalisariutit avaleraasartoorniarnermi 2011-miit peqataasalerput.
Nunat assigiinngitsut 11-nit amerlanerusut ammassassuarniaqataasarput, 2017-imilu tamakkerlutik pisarisimasaat 805.142 tonsit missaanniissimapput. Aalisariutit Nunatsinneersut ammassassuarnermi 2007-imiit peqataasalerput, Pinngortitaleriffimmit tusagassiuutinut nalunaarummi tamanna atuarneqarsinnaavoq.
Illuanik saarullernartanut tunngatillugu nutaarsiassatsialaqarpoq.
Tassani ICES´imit 2017-imut 1.387.872 tonsit sinnernagit saarullernartassiissutigineqarsinnaasutut innersuussutigineqarput, tassa 2017-imut innersuussutigineqartunit 2018-imi 3%-imik qaffariaateqartitsisoqarluni.
Kalaallit aalisariutaataat nunat tamalaat imartaanni Savalimmiullu imartaanni nunat sineriallit isumaqatigiissuteqarfiginerisigut saarullernarniartarput. Kalaallit aalisariutaat amerlagisassaanngitsunik Kalaallit Nunaata imartaani pisaqartarput.