Billetsinik amerlanerusunik sanatitsisoqarpoq
Pele Møller Band Københavnimi akunnerni marlunni jazzimik tusarnaartitsipput
Kalaallit ikinngutaatut Kalaallit Illuutaannut jazzeriarput, tassani akiliisut 75-it angullugit amerlassusillit ikinngutitik ilisarisimasatillu peqatigalugit jazzimik tusarnaartinneqarlutik.
– Billitsinik immikkut sanatitsisariaqarsimavugut. Taama amerlatigisut takkunnissaat ilimagisimanngilarput. Siorna akiliillutik isertut 45-uupput, ullumilu jazzimik tusarnaariat 75-iupput. Tamatuma saniatigut billetsinik tuniniaanerup kingornatigut takkutillattaartoqarpoq, Kalaallit Illuutaanni sulisoq Søren Thalund Sermitsiaq.AG-mut oqarpoq.
Avataanit nipilersoqataavoq Pele Møllerip ernerani Glenn Møller, atukkani marlunni noqartilimmik nipilersortoq tusarnaartunit nuannarineqarluartumik.
Pele Møller Band, tassaasut Pele Møller guitarertoq, Lone Josefsen erinarsortoq, Sofus Kornebæk noqartilissortoq, Finn Lynge saxofonertoq, Roy Bonnage tumerparpaartoq aamma Evan Petersen kontrabas-ertoq, siorna Kalaallit Illuutaanni tusarnaartitsinermik saniatigut aamma Roskildemi Nuummilu tusarnaartistipput.
Akissarsiutigalugu nipilersortartut
Nipilersoqatigiinni ilaasortat sisamat Danmarkimi aalajangersimasumik najugaqarput akissarsiutigalugulu nipilersortartuullutik.
– Sisamaalluta nipilersornermik akissarsiuteqarpugut. Nalunngilaralu saxofonertartorput ullumi Kongens Havemi Leonardo Pedersens Jazz Band-imi nipilersussasoq, allallu marluk aamma sapaatip akunnerani tullermi suliassaqarput, Sofus Kornebæk oqaluttuarpoq.
– Siorna Nuummut tikisinneqarpugut Katuamilu nipilersorluta. Pele uangalu sivisuumik immitsinnut ilisarisimasimavugut. 1960-ikkut aallartinneranni Hundestedimi naapippugut. TAssani Asserbro Kro-mi ukioq ataaseq nipilersorpugut, Kornebæk Sermitsiaq.AG-mut oqaluttuarpoq.
Nipilersoqatigiit 2004-mi katersuussimapput Pele Møller cd-mik immiussimmat.