Ikummatissat
Biiliutilinnut illuutilinnullu nutaarsiassaq nuannersoq
Aqagu ulloq 1. april benziina, petruuliu gasolielu akii apparneqassapput.
Ikummatissanut akigitinneqartoq literimut 20 øre-mik apparneqarpoq.
2014-miik tallimassaanik akinik appaaneq
Nunarsuarmi akit appariartorneri ilutigalugit septemberimi 2014-mik akit tallimariarlugit appartinneqartareersimasimapput.
1. april akit imaalissapput:
Gasolie/diesel: literimut 5,75 kr-imiit 5,55 kr.-imut appartinneqarpoq avatangiisinut akitsuut literimut 10 øre-usoq ilanngullugu. Petroleum: literimut 5,86 kr.-imiit 5,66 kr.-imut appartinneqarpoq avatangiisinut akitsuut literimut 10 øre-usoq ilanngullugu.
Benzin: literimut 5,60 kr.-imiit 5,40 kr.-imut appartinneqarpoq avatangiisinut akitsuut literimut 10 øreusoq ilanngullugu.
Jet A-1 (timmisartup orsussaa) literimut 20 øre-mik akikillissaaq, 5,78 kr.-imiit 5,58 kr.-imut.
Inuiaqatigiit 135 mio koruuninik sipaaruteqassapput
- Ikummatissanut literimut akit 1,10 koruniinik 2014-miik appariarsimasoq, Polaroil tusagassiuutinut nalunaarummini paasissutissiivoq.
Akinik appaaneq inuiaqatigiit ikummatissamut ukiumut 135 mio koruuninik sipaaruteqaataassaaq.
- Akinik appaanermut pissutaanerpaapput 2017-imi ikummatissarsiniarnissami akit qulakkeerneqarsimasut appasinnerunerat amerikarmiullu aningaasaata naliganik qulakkeerinnissutit akikinnerunerannit, Polaroil paasissutissiivoq.
Ikkummatisanut atuineq annikillerujussuartoq
Polaroilip ikummatissanik atuineq annikilliartortoq paasissutissiaraa 2009-imilu ikummatissamut tunineqartartup 75 %-iinnerivaa. Ikummatissamik atuinikinnerulerneq pissuteqarpoq erngup nukiganik innaallagissiorfiit atorneqarnerulersimanerinit, kiisalu illut oqorsaasersorneqarnermikkut oqornerulersimanerannit, aammalu kiassaatit motoorillu allat nutaaliaanerusut orsussamik atuinikinnerusut atorneqarnerulersimanerinit.