isumannaallisaaneq
Biilit ukiuni 18-ini misissorneqanngitsut
Danskit oqartussat kalaallit biilii kingullermik 1999-imi misissorpaat
Ukiuni 18-ini kingullerni kalaallit biileqartut biilitik misissortissimanngilaat.
Aaja Chemnitz Larsenip (IA) danskit angallannermut ministeriannut Hans Christian Schmidtimut (V) apeqquteqarnerani akissummi tamanna takuneqarsinnaavoq.
- Kalaallit biiliinik misissuineq kingullermik 1999-imi pivoq, tassani Statens Bilinspektioniusimasimasup sulisui sisamat Kalaallit Nunaanni misissuilluni angalaarput, Hans Christian Schmidt allappoq.
Atuaruk: Biilinik misissuisoqartaqqilissaaq
Sulisitsisut akerliusut
2005-imili Nuup aamma Københavnip akornanni biilinik misissuinerup eqqunneqarnissaanut isumaqatigiinniartoqartarsimavoq. Aatsaallu 2012-mi inatsisissatut siunnersuusiortoqarpoq, taassumalu imaraa biilileriffiit misissuinernut akisussaasassasut. Suliarli tassani unippoq.
- Siunnersuut pillugu Kalaallit Nunaanni tusarniaanerup takutippaa, Sulisitsisut siunnersuummut akerliulluinnartut, Hans Christian Schmidt (V) allappoq.
Atuaruk: Biilit pisoqqat peertussanngorput
Taamaamma taamani Naalakkersuisuusut januaarimi 2013-imi aalajangerput, siunersuut Inatsisartuni saqqummiunneqassanngitsoq. Taassumalu kingorna suliaq unittuusivoq. Hans Christian Schmidtip naalakkersuisoqarfiata maanna Namminersorlutik Oqartussat attaveqarfigissagai allappoq.