eqqagassat
Biilit sumiginnakkat aputaajaanermut akornutaapput
Illoqarfimmi sumi tamaani biilinik inissiisarfinni biilerpassuaqarpoq normu-pladeqanngitsunik aputaajaanermut akornusersuutaasunik
Sapaatip akunnerani ullup unnuallu ataatsip ingerlaneranni Nuummi 45 millimeterit missaannik apivoq. Taamaattumik aqquserngit biilinillu inissiisarfiit nivattaassuarnik sukkasuumik aputaajarneqartariaqarput.
Apummi morsussimasut
Biilerpassuit normu-pladeqanngitsut illoqarfimmi sumut tamaanga qimaannarneqarsimasut najugaqartunut akornutaapput, tassa biilinut inissiisarfinnik, biiliutillit allat atugassaraluinik arsaartaramikkit.
Tamatuma saniatigut kommunip aputaajaaneranut akornutaapput, biilit apummi morsussimasarmata takujuminaassinnaasarlutillu.
Akiliisitsiniarpoq
Illoqarfiit pingaarnersaata kommuneqarfia maanna nalunaaruteqarpoq biilit igitassat normu-pladqanngitsut piiarniarlugit.
– Biilit piffissami qaninnerpaami peerneqarsimanngippata Kommuneqarfik Sermersuup biilit piiassavai tamassumalu akia piginnittumut akiligassanngortillugu.