Motoori
Biilit imaaliorlutit issilernisaanut piareersassavatit
Biilileriffinni iluarsaasartut piffissami matumani ulappuppput. Biilertartorpassuit assakaasunik taarsersuinerminnut ilanngullugu biiliminnik misissuisitsipput
Iluarsaasarfinni piffissami matumani ulappunnersuaqarpoq.
Nuummi Deres Automi iluarsaasarfiup aqutsisua Benny Pedersen mekanikerillu arfinillit ukiorpallaartinnagu assakaasunik taarsersuillutik biilinillu misissuillutik ulloq naallugu suliaqartarput.
Atuaruk: Biilit ukiuni 18-ini misissorneqanngitsut
Misissuineq
Inuppassuimmi assakaasunik taarsiinerminnut atatillugu biiliminnik aamma ukiup affaanoortumik misissuisitsisarput. Tamannalu silatusaarnerusarpoq, iluarsaasarfiup aqutsisua isumaqarpoq.
– Biilinik ukiornissaanut misissuinernik taaneqartunik suliaqartarpugut tamatumalu peqatigisaanik assakaasunik naqquusalinnik taarsersuisarluta. Ukiornissaanut misissuinerni ilaatigut batteriit, aallartitsissut, kiassaatit, ikummatissamut silaannarmullu filterit misissortarpavut. Filterit milittooqqavallaartillugit biilerpassuit issilinerani aallartikkuminaannerulerarput, Benny Pedersen oqarpoq.
Atuaruk: Kalaallit Nunaanni biilit amerleriarujussuartut
Ullormut biilit 70-t
Deres Auto piffissami matumani biilinik ullormut 70-it missaanniittunik tigusisarpoq, tamannalu nalinginnaasuminngaanniit pingasoriaataalluni. Assakaasunik taarsiineq nalinginnaasoq akunnerup affaani pisinnaasarpoq.
Kisianni tamatuma peqatigisaanik misissuisoqassappat biili ataaseq akunnerit pingasut angullugit sivisussusilimmik suliarineqartarpoq. Misissuineq ataaseq nalinginnaasumik 1500 aamma 4500 koruunit akornanni akeqartarpoq. Assakaasunillu taarsineq nammineq assakaasunik ilivitsunik nassataqaraanni 299 koruuninik akeqartarpoq.
Innaallagissamoortunik hybridinilluunniit biileqaruit ukiornissaanut ernumavallaartariaqanngilatit. Taakkua Benny Pedersen naapertorlugu ukiuunerani issi anigorluartarpaat.
Angallatit biilillu pillugit Sermitsiami tapiliussami Motoorimi allaaserisat amerlanerusut atuakkit, uani sapaatip-akunnerani aviisimi taanna ilaavoq. Aviisi uani aamma pisiariuk: