Qaqortoq
Biilinik tillissorisaq Qaqortumi ajutoortoq
Biilimik attartortittakkamik Qaqortumi ajutoortoqarpoq
Qaqortumi politiit maanna paasiniarpaat biilimik tillittoqarsimasinnaaneranik pasillerneq. Biili attartortittaq pingasunngornerup ullaassaani ajutoorpoq. Biilimik attartortitsisartup qularinngilaa biili tillinneqarsimasoq, politiilli uppernarsaatissanik ujarlerput.
Qaqortumi politiit pingasunngornerup ullaassaani nalunaarfigineqarput aqqusinermi angallannermi ajutoortoqarsimasoqæ. Biili attartortittagaq inissiarsuit ilaanni ajutoorsimavoq.
Aalakoorluni ingerlatitsisoq inuit takuaat
- Ajutoorfiusumut politiit anngunneranni biili inuttaqanngilaq. Maanna misissorparput biili tillinneqarsimanersoq, maannakkuugallartorlu annerusumik oqaaseqarsinnaanngilagut, Qaqortumi politiini ulluinnarni aqutsisuugallartoq Sîvalêraq Terkildsen Sermitsiaq.AG-mut oqarpoq.
Biili attartortittagaavoq Aqqaluk Ilinngivakkeermit pigineqartoq. Taassuma qularinngilaa biili tillinneqarsimasoq.
- Annertuumik ajoqusersimavoq nillusaasualu aserorsimalluni. Inunnit takunnissimasunit oqaluttuunneqarpugut inuk kinaanera ilisarnartoq aalakoorluni biilimik unnuaq ingerlatitsisimasoq, Aqqaluk Ilinngivakkeeq Sermitsiaq.AG-mut oqarpoq.