politiit
Biilimik qimaasoq: Nuummi unnuaq biilertumik qimaasumik malersuineq
Politiit biilii pingasut biilerluni qimaasumik malersueqataapput, taannalu Nuutoqqami Rigsombudsmandip illuata ungaluliaanut apormat tigusarineqarpoq
Unnuaq nalunaaqutaq pingasut sisamallu akornanni Nuummi biilertumik qimaasumik malersuinermi igeriartoqarpoq. Inunnik ajoqusertoqanngilaq. Taamatut paasissutissiivoq Nuummi Politiini pigaartoq politiassistent Mads Lynge.
Nalinginnaasumik aqqusinermi angallattunik misissuinermi nalunaaqutaq 3.20 missaani politiit biili nioqqutissanik assartuut tungujortoq 21-nik ukiulimmik aquttulik unitseriaraluarpaat. Politiit kørekortia takorusuinnarsimavaat imersimananilu biilernersoq takuniarlugu. Biilili unikkumanngilaq. Tamatuma kingorna politiit malersulerpaat, Mads Lynge paasissutissiivoq.
Biilimik qimaasoq ingerlaannarpoq politiit paapoorlutik qaammallattuliorlutillu malersoraluaraatik. Piffissap ilaani politiit biilii pingasut malersueqataalersmapput, isiginnittut oqaluttuarput. Nuussuaq marlussoriarlugu kaajallareerlugu politiit biilerneq ima ulorianarsorilertigaat, biilip assakaasua aallaallugu pullaariaraluarlugu.
– Biilip assakaasua pingasoriarluni eqqoriarneqarpoq, pigaartoq oqarpoq.
– Taamaasiornikkut biili unitsinngitsoorparput. Sipisalli tungaanut kaajallattarfimmi biilertup ujarak aqqusaarpaa assakaasualu pullaarlluni, sipisakkulli ingerlaannarluni Nuutoqqap tungaanukarpoq, tassani Rigsombudsmandip illuata ungaluanut aporami unilluni. Biili aallarussimavaa, 21-nillu ukiulik tigusarineqarpoq. Biilimi kisimiissimavoq.
Politiit biili tikimmassuk matu ammarumanngilaa. Politiit biilip igalaava aserortariaqarpaat tigusarniarlugu, pigaartoq oqaluttuarpoq.
21-nik ukiulik malugisimaarsimavoq, oqaatigineqanngilarli qanoq promilleqarsimanersoq. Biilimik aallarussisoq kørekorteqanngilaq, Mads Lynge, Nuuk Politiineersoq oqarpoq.
Rigsombudsmandi angerlarsimanngilaq. Taanna kunngissakkullu Kujataaniippoq.